Şabran-Əmirxanlı-Qazbabalı avtomobil yolu yenidən qurulur VİDEO
Bakı, 18 aprel, AZƏRTAC
Şabran rayonunda Şabran-Əmirxanlı-Qazbabalı avtomobil yolu Azərbaycan Avtomobil Yolları Dövlət Agentliyi tərəfindən yenidən qurulur.
Agentliyin mətbuat xidmətindən AZƏRTAC-a bildirilib ki, IV texniki dərəcəyə uyğun 29 kilometr uzunluğunda olan yolun 19,7 kilometrlik hissəsi çınqıl örtüklüdür.
Tikinti layihəsinə uyğun olaraq, hazırda yolun 19,7 kilometrlik hissəsində qabarmış və çökmüş hissələrinin qazılaraq çıxarılması, qazılmış hissələrinin doldurulması, yolun torpaq yatağının qaldırılması və genişləndirilməsi, qruntun hissə-hissə avtoqreyderlə yayılması və lay-lay kipləşdirilməsi işləri aparılır. Torpaq yatağının tikintisi yekunlaşandan sonra, 200 min kvadratmetr sahədə 20 santimetr qalınlıqda optimal-qırmadaş qarışığı ilə əsasın alt layının, 16 santimetr qalınlıqda qum-çınqıl qarışığından isə əsasın üst layının tikintisi işləri aparılacaq.
Şabran-Əmirxanlı-Qazbabalı avtomobil yolunun 6,3 kilometrlik hissəsində isə mövcud asfalt-beton örtüyün frezlənərək profilə salınması, yolun qabarmış və çökmüş hissələrinin qazılaraq çıxarılması və yararlı qruntla yenidən doldurularaq kipləşdirilməsi işləri görüləcək. Həmçinin doldurulmuş hissələrdə yol əsasının alt və üst layının nəzərdə tutulmuş qarışıqlardan istifadə edilməklə tikintisi aparılacaq.
Bundan başqa, marşrut boyu 6 ədəd yararsız hala düşmüş müxtəlif diametrli suötürücü boruların yeniləri ilə əvəz edilməsi və zəruri olan yerlərdə yenilərinin tikintisi də nəzərdə tutulub. Bu məqsədlə yol boyu müxtəlif diametrli uzunluğu 239 poqonmetr olan 30 ədəd dəmir-beton borunun quraşdırılması, boru başlıqlarının dəmir-beton tikilməsi və boruların izolyasiyası işlərinə başlanılacaq.
Daha sonra yolun 5,8-ci kilometrində - Dəvəçi çayı üzərində uzunluğu 21 metr, eni isə 8 metr olan 1 aşırımlı körpünün, 680 metr uzunluğunda dəmir-beton istinad divarlarının, relyefdən asılı olaraq bir neçə yerdə 3 min poqonmetr uzunluğunda beton küvetlərin tikintisi də layihədə nəzərdə tutulub.
Tikinti norma və standartlarına uyğun olaraq, tikinti işlərinin sonuncu mərhələsində yolboyu iri və xırda dənəli asfalt-beton qarışığından örtüyün alt və üst layının tikintisi aparılacaq, 12 yerdə avtobus dayanacağı, həmçinin hərəkətin normal təşkili üçün 85 ədəd yol nişanı, 26 ədəd kilometr göstərici və 1016 ədəd siqnal dirəyi quraşdırılacaq, 77,9 kilometr uzunluğunda xətlənmə işləri yerinə yetiriləcək.
Şabran-Əmirxanlı-Qazbabalı avtomobil yolu 5 yaşayış məntəqəsini əhatə etməklə 6 mindən artıq sakinin rayon mərkəzinə, oradan isə respublikanın istənilən nöqtəsinə rahat gediş-gəlişini təmin edəcək, marşrut boyu kənd təsərrüfatı və turizmin daha da inkişaf etməsinə şərait yaradacaq.
Bölmənin digər xəbərləri
