Şagirdlərə “Özünəqəsdin sosial-psixoloji amilləri” kitabları paylanılmışdır
Bakı, 18 noyabr (AZƏRTAC). Bakının Nizami rayonundakı 129 nömrəli orta məktəbdə Azərbaycan Respublikasının Prezidenti yanında Gənclər Fondunun maliyyə dəstəyi ilə “Təkan” Tələbə Gənclərin İctimai Birliyinin (TGİB) “Yeniyetmə və gənclər arasında sosial-psixoloji maarifləndirmə tədbirləri” layihəsinin təqdimatı olmuşdur.
İctimai birlikdən AZƏRTAC-a bildirmişlər ki, tədbirdə məktəbin direktoru Samir Mehdizadə, Gənclər və İdman Nazirliyinin şöbə müdiri Elşən Hüseynov və “Təkan” TGİB-nin sədri Leyla Kərimova çıxış edərək layihənin əhəmiyyətindən danışmışlar.
Gənclər Fondunun maliyyə dəstəyi ilə “Təkan” TGİB tərəfindən çap edilən “Özünəqəsdin sosial-psixoloji amilləri” kitabının müəllifi Diyanə Hüseynova layihə haqqında geniş təqdimatla çıxış etmiş və məktəblilərə təlim keçmişdir. Təlimin sonunda şagirdlərə “Özünəqəsdin sosial-psixoloji amilləri” kitabları paylanılmışdır.
Layihənin təqdimatı digər məktəblərdə və regionlarda da keçiriləcəkdir.
Bölmənin digər xəbərləri
