Şahin Xudaverdiyev: Qadın karateçilərimiz dünya çempionatına ciddi hazırlaşırlar
Bakı, 19 oktyabr, AZƏRTAC
“Uzun müddətdir dünya çempionatı ilə əlaqədar təlim-məşq toplanışları keçirik. Yay aylarında belə, istirahətsiz çalışdıq”.
AZƏRTAC xəbər verir ki, bu sözləri qadın karateçilərdən ibarət Azərbaycan yığmasının baş məşqçisi Şahin Xudaverdiyev dünya çempionatına hazırlıqla bağlı təşkil olunan açıq məşq zamanı jurnalistlərə açıqlamasında deyib.
Mundialın iki ildən bir keçirildiyini xatırladan mütəxəssis bütün ölkələrin yarışa ciddi hazırlaşdığını bildirib: “Biz də yaxşı nəticə qazanmaq üçün əlimizdən gələni edirik. Düşünürük ki, Vətənə yaxşı nəticələrlə dönəcəyik. İdmanda hər şey mümkündür. Karateçi zədələnə və bu səbəbdən yaxşı nəticə əldə etməyə bilər. Bununla belə, ölkəyə medalsız qayıtmacağımıza ümid edirəm”.
O, zədəsini sağaldan yığma üzvü Fidan Teymurovanın son durumunu da açıqlayıb: “İdmançımızın topuğunda yırtıq əmələ gəlmişdi. Bununla əlaqədar müəyyən müalicələr aldı. Sevindirici haldır ki, bizimlə birgə dünya çempionatına yollanacaq”.
Qeyd edək ki, karate üzrə dünya çempionatı oktyabrın 24-dən 29-dək Macarıstanın paytaxtı Budapeştdə keçiriləcək.
Bölmənin digər xəbərləri
