Şamil Ayrım: Beynəlxalq ictimaiyyət Qərbi azərbaycanlıların qayıdış hüququnu tanımalıdır
Ankara, 22 may, AZƏRTAC
Beynəlxalq ictimaiyyət, insan hüquqları təşkilatları və BMT Qərbi azərbaycanlıların doğma yurdlarına ləyaqətli qayıdış hüququnu tanımalı və dəstəkləməlidir.
AZƏRTAC xəbər verir ki, bu barədə Türkiyə Böyük Millət Məclisinin (TBMM) Türkiyə-Azərbaycan parlamentlərarası dostluq qrupunun rəhbəri Şamil Ayrım mayın 21-də Ankarada keçirilən “Qərbi Azərbaycana qayıdış insan hüquqlarının aliliyinin mühüm şərti kimi" mövzusunda beynəlxalq konfrans çərçivəsində bildirib.
Onun sözlərinə görə, Qərbi Azərbaycana qayıdış tələbi Ermənistana qarşı ərazi iddiası deyildir. “Bu, tamamilə tarixi ədalətin bərpası məsələsidir. Bu baxımdan həqiqətlər dünya ictimaiyyətinə geniş şəkildə çatdırılmalıdır. İrəvan və onun himayədarlarının mövzunu təhrif edərək, Azərbaycana qarşı istifadə etməsinə imkan verilməməlidir”, - deyə türkiyəli deputat vurğulayıb.
Azərbaycan Prezidenti İlham Əliyevin sülh və davamlı inkişafı təmin etmək üçün yürütdüyü siyasətə diqqət yönəldən Ayrım, “Azərbaycanın Ermənistana qarşı ərazi iddiası olsaydı, Qərbi Azərbaycanla bağlı maddə sülh müqaviləsinin yekun mətnində öz əksini tapardı. Bununla belə qeyd etmək istərdim ki, sülhə gedən yol Ermənistanın öz konstitusiyasını dəyişdirməsindən və ATƏT-in Minsk qrupunun buraxılmasından keçir”, - deyə bildirib.
Türkiyəli siyasətçilərə, elm xadimlərinə və ekspertlərə səslənən Ş.Ayrım, Qərbi Azərbaycana qayıdış məsələsinin bütün platformalarda gündəliyə gətirilməsini istədi.
Yaxın günlərdə Azərbaycan Xalq Cümhuriyyətinin yaradılmasının növbəti ildönümünün qeyd olunacağını vurğulayan Türkiyə parlamentinin üzvü, “1918-ci ildə yaradılan dövlət müsəlman Şərqinin parlayan ulduzu idi. Azərbaycan Bayrağı, sadəcə, bir millətin deyil, ədalətin, azadlığın və qardaşlığın rəmzidir”, - deyə vurğulayıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
