“Samsung” şirkəti "Galaxy S7" və "Galaxy S7 Edge" smartfonlarını təqdim edib
Bakı, 22 fevral, AZƏRTAC
"Samsung" şirkəti Barselonada keçirilən Ümumdünya Mobil Konqresində "Galaxy S7" və "Galaxy S7 Edge" qabaqcıl smartfonlarını təqdim edib.
Yeni modellər əvvəlki "S6" və "S6 Edge"nin təkmilləşdirilmiş modifikasiyasıdır. "S7" modeli 5.1 düym diaqonallı, "S7 Edge" isə 5.5 düym diaqonallı "AMOLED" displeylə təchiz edilib.
AZƏRTAC “ria.ru" saytına istinadən xəbər verir ki, əvvəlki modellərlə müqayisədə indi prosessorun işləmə sürəti 33 faiz artıb. İstehsalçılar, həmçinin daxili kameranın təkmilləşdirilməsi haqqında məlumat veriblər, akkumulyator batareyasının tutumu 3600 milliamper/saat təşkil edir, cihaz suya dayanıqlıdır və "MicroSD" kartlar yenidən əlçatandır.
Hər iki smartfon "Android 6.0" sistemi və "Adreno 530" qrafikasına malik dördnüvəli "Qualcomm Snapdragon 820" və ya səkkiznüvəli "Samsung Exynos" prosessoru ilə işləyəcək.
Qurğunun əməli yaddaşı 4 QB, daxili yaddaşı isə 32 QB təşkil edəcək.
Daimi yanan vəziyyətdə olan ekran funksiyası bildirişlər, cari vaxt və ya əlamətdar hadisələr haqda xəbərdar olmağa imkan verir.
Fevralın 22-dən etibarən yeni modelləri sifariş etmək mümkündür.
Bölmənin digər xəbərləri
