Səbail rayonunda Xocalı soyqırımı qurbanlarının xatirəsi anılmışdır
Bakı, 25 fevral (AZƏRTAC). Xocalı faciəsinin 21-ci ildönümü respublikamızın hər yerində olduğu kimi, Səbail rayonunda da geniş şəkildə qeyd olunur. Səbail Rayon İcra Hakimiyyəti (RİH) tərəfindən hazırlanmış tədbirlər planına uyğun olaraq rayonun idarə və təşkilatlarında, orta və ali məktəblərində faciə ilə bağlı müxtəlif tədbirlər keçirilir. Rayonun mədəniyyət müəssisələrində faciənin ildönümü ilə bağlı xatirə gecələri, foto və rəsm sərgiləri, şahidlərlə görüşlər təşkil olunmuşdur.
RİH-dən AZƏRTAC-a bildirmişlər ki, fevralın 25-də rayonun orta və ali məktəblərində ilk dərslər Xocalı faciəsinə həsr olunmuş, rayonun ali məktəblərində anma tədbirləri keçirilmiş, eləcə də Azərbaycan Dövlət Gənc Tamaşaçılar Teatrında “Əcəl atı” tamaşasına, Badamdar mədəniyyət evində isə Aygün Həsənoğlunun “Adsız qadın” romanı əsasında hazırlanan tamaşaya ictimai baxış təşkil olunmuşdur.
Faciənin ildönümü ərəfəsində Azərbaycan Vətən Müharibəsi Veteranları Birliyi Səbail rayon şöbəsinin qərargahında Xocalı şəhərindən köçkün düşərək bu rayonda məskunlaşmış 22 ailənin nümayəndələri ilə görüş keçirilmişdir.
Tədbirdə çıxış edən Səbail Rayon İcra Hakimiyyətinin başçısı Asif Əsgərov xalqımızın qan yaddaşı olan Xocalı faciəsi, ermənilərin zaman-zaman Azərbaycana qarşı törətdikləri vəhşiliklər və soyqırımı ilə bağlı həqiqətlərin dünya ictimaiyyətinə çatdırılmasında görülməsi vacib olan işlər barədə ətraflı məlumat vermişdir. Bildirilmişdir ki, faciənin geniş ictimaiyyətə çatdırılması üçün xalqımızın ümummilli lideri Heydər Əliyevin böyük əməyi olmuşdur. Məhz onun təşəbbüsü ilə Milli Məclisdə ilk dəfə bu məsələyə siyasi qiymət verilmiş, faciənin dünya ictimaiyyətinə çatdırılması məqsədi ilə işlərə başlanmışdır. Bu işlərin nəticəsidir ki, hər il faciənin ildönümü istər respublikamızda, istərsə də onun hüdudlarından kənarlarda geniş qeyd olunur, soyqırımı qurbanlarının xatirəsi yad edilir, dünya ictimaiyyətinə ermənilərin iç üzü göstərilir.
Asif Əsgərov bu gün Prezident İlham Əliyevin apardığı məqsədyönlü siyasət nəticəsində Xocalının, həmçinin işğal altında olan bütün Azərbaycan torpaqlarının düşməndən azad ediləcəyinə, ölkəmizin ərazi bütövlüyünün bərpa ediləcəyinə əmin olduğunu bildirmişdir. Qeyd edilmişdir ki, lazım gələrsə dövlətimizin başçısı, Ali Baş Komandanın əmri ilə silaha sayrılaraq müharibə yolu ilə torpaqlarımızın azad olunması üçün bütün qüvvələr səfərbər ediləcəkdir.
Qeyd olunmuşdur ki, fevralın 26-da rayonun sənaye, təhsil, səhiyyə və s. müəssisələrinin kollektivlərinin “Xocalı harayı” abidəsinin ziyarəti təşkil ediləcəkdir. Həmin gün rayonun məscidlərində Xocalı faciəsi zamanı şəhid olmuş soydaşlarımızın ruhuna dualar oxunacaqdır. “Bibiheybət” və İçəri şəhər “Cümə” məscidlərində ehsanlar veriləcəkdir.
Tədbirdə çıxış edən Xocalı Rayon İcra Hakimiyyətinin əməkdaşı Nadir Rəşadov və başqaları ölkə rəhbərliyinin səyləri ilə Xocalının azad olunacağı günü səbirsizliklə gözlədiklərini və bu günün tezliklə gələcəyinə əmin olduqlarını bildirmişlər.
Sonda Səbail rayonunda məskunlaşmış Xocalıdan olan məcburi köçkünlərə rayon icra hakimiyyəti tərəfindən maddi və ərzaq yardımları göstərilmişdir.
Bölmənin digər xəbərləri
