ŞƏHİD AİLƏLƏRİ VƏ QARABAĞ ƏLİLLƏRİ ÜÇÜN YENİ YAŞAYIŞ BİNASI İSTİFADƏYƏ VERİLMİŞDİR
Abşeron rayonunun Xırdalan qəsəbəsində Əmək və Əhalinin Sosial Müdafiəsi Nazirliyinin təşəbbüsü ilə şəhid ailələri və Qarabağ müharibəsi əlilləri üçün inşa edilmiş yaşayış binası istifadəyə verilmişdir.
Bu münasibətlə təşkil olunmuş mərasimi nazir müavini Tahir Budaqov açaraq, Prezident Heydər Əliyevin şəhid ailələrinə və Qarabağ müharibəsi əlillərinə göstərdiyi qayğıdan və onların sosial məsələlərinin həlli sahəsində görülən işlərdən danışdı. Bildirdi ki, indiyə kimi həmin qəbildən olan 467 ailə yeni mənzillə təmin olunmuşdur. Binəqədi rayonunun Mehdiabad qəsəbəsində 50 evdən ibarət yaşayış məntəqəsi salınmışdır. İndi istifadəyə verilən binada isə 36 ailə mənzil alacaqdır.
Əmək və əhalinin sosial müdafiəsi naziri Əli Nağıyev təzə mənzil alanları təbrik edərək dedi ki, onların sosial problemlərinin həlli ölkə prezidentinin bilavasitə tapşırığı ilə həyata keçirilir. Yeni binanın keyfiyyətlə tikildiyini vurğulayan nazir inşaatçılara təşəkkür etdi və dedi ki, yaxın zamanlarda Bakı şəhərinin Sabunçu rayonunda, Şəki şəhərində və respublikamızın digər bölgələrində də şəhid ailələri, Qarabağ müharibəsi əlilləri üçün yaşayış binaları və fərdi evlər inşa olunacaqdır.
Təzə mənzil alan Qarabağ müharibəsi əlili İlham Nəcəfov və şəhid ailəsinin üzvü Təranə Əmirova onlara göstərilən qayğı və diqqətə görə dövlətimizin başçısına, Əmək və Əhalinin Sosial Müdafiəsi Nazirliyinə minnətdarlıqlarını bildirdilər.
Mərasimdə Abşeron rayon icra hakimiyyətinin başçısı Mirzə Novruzov, Milli Məclisin deputatı Musa Quliyev, Qarabağ Müharibəsi Əlilləri, Veteranları və Şəhid Ailələri İctimai Birliyinin sədri Mehdi Mehdiyev və başqaları da çıxış edərək yeni mənzil alanları təbrik etdilər.
Sonra mənzillərin orderləri təqdim edildi.
Mərasim iştirakçıları hər cür kommunal şəraiti olan yaraşıqlı mənzillərlə tanış oldular, sakinlərə xoş arzularını çatdırdılar.
Bölmənin digər xəbərləri
