ŞƏKİDƏ AQRAR SAHƏNİN İNKİŞAFINA DİQQƏT ARTIR
Şəki şəhər İcra Hakimiyyətinin aqrar məsələlər şöbəsindən müxbirimizə bildirmişlər ki, islahatlar nəticəsində əmlak payı almaq hüququ olan 41 min 200 nəfərə 983 yük maşını, 775 traktor, 214 taxılyığan və 121 silos və yemyığan kombayn, 127 mal-qara tövləsi, 55 qoyun yatağı verilmişdir. Əhaliyə verilən əmlakın ümumi dəyəri 71 milyard manatdır.
Rayonda heyvandarlığın dinamik inkişafı təmin edilmişdir. Damazlıq işlərinin müasir tələblər səviyyəsində təşkili, naxırda ana malın xüsusi çəkisinin artırılması, baytarlıq xidmətlərinin yaxşılaşdırılması mal-qaranın, davarın ümumi sayının artırılmasına gətirib çıxarmışdır. Hazırda rayon üzrə qara malın sayı 2002-ci ilin müvafiq dövrü ilə müqayisədə 1556 baş və ya 2,6 faiz artaraq 62 min 320 başa, davarın sayı isə 96 min 64 baş və ya 4,9 faiz artaraq 20 min 1111 başa çatdırılmışdır.
Cari ilin birinci yarısında baş vermiş təbii fəlakət nəticəsində rayonun təsərrüfatlarına xeyli dərəcədə ziyan dəymiş, əkin sahələri yararsız hala düşmüşdü. Lakin bütün çətinliklərə baxmayaraq, Şəki taxılçıları bu il də öz ənənələrinə sadiq qalaraq sahələrdən bol məhsul - 80 min ton taxıl yığmağa müvəffəq olmuşlar. Bu göstərici Şəki əhalisinin taxıla olan illik ehtiyacından iki dəfə çoxdur.
Bu il 50 min hektarda payızlıq taxılın əkilməsi nəzərdə tutulmuşdur. İndiyədək 10 min hektardan artıq sahədə əkin başa çatdırılmışdır.
Cari ildə rayon ərazisində suvarılan torpaqların genişləndirilməsinə də diqqət xeyli artırılıb. 1982-ci ildən yarımçıq qalmış Əyridərə su anbarının tikintisinin başa çatdırılması işləri davam etdirilir. Su anbarının istifadəyə verilməsi daha 7 min hektar torpağın suvarılmasına şərait yaradacaqdır. Əyriçay dəryaçasının tam gücü ilə işləməsi üçün də kompleks tədbirlər görülür.
Bölmənin digər xəbərləri
