ŞƏKİDƏ ŞƏFİQƏ AXUNDOVANIN 80 İLLİYİ QEYD OLUNMUŞDUR
AZƏRTAC-ın müxbiri xəbər verir ki, yubiley münasibətilə Şəki şəhərində keçirilən “Musiqiyə həsr olunmuş ömür” adlı ədəbi-bədii gecəyə toplaşanlar yubilyarı böyük sevgi ilə qarşılamışlar.
Yubiley gecəsində iştirak edən respublika Bəstəkarlar İttifaqının katibi Lalə Hüseynova, ombudsman Elmira Süleymanova, ayrı-ayrı kollektivlərin nümayəndələri yubilyara xoş arzularını bildirmiş, onun Azərbaycan milli musiqi sənətinin inkişafındakı xidmətləri barədə danışmış, müəllifi olduğu “Gəlin qayası” operasının Şərqdə qadın bəstəkar tərəfindən yazılan ilk səhnə əsəri olduğunu iftixar hissi ilə qeyd etmişlər.
Yubilyarı səmimi təbrik edən Şəki Şəhər İcra Hakimiyyətinin başçısı Əşrəf Məmmədov Şəfiqə Axundovanı Azərbaycan bəstəkarlıq məktəbinin ən dəyərli nümayəndələrindən biri kimi qiymətləndirmiş, musiqi sənətinin inkişafındakı xidmətlərinə və anadan olmasının 80 illik yubileyinə görə görkəmli bəstəkara icra hakimiyyətinin fəxri fərmanını təqdim etmişdir.
Səmimi təbriklərə görə rayon rəhbərliyinə və tədbir iştirakçılarına xoş arzularını bildirən bəstəkar Şəfiqə Axundova bu unudulmaz gecənin heç vaxt yaddaşından silinməyəcəyini qeyd etmişdir.
Tədbir boyu ifa olunan mahnılar iştirakçılar tərəfindən hərarətli alqışlarla qarşılanmışdır.
Bölmənin digər xəbərləri
