ŞƏKİDƏ YANĞIN TƏHLÜKƏSİZLİYİ TƏDBİRLƏRİNƏ HƏSR OLUNMUŞ ZONA MÜŞAVİRƏSİ
AZƏRTAC-ın müxbiri xəbər verir ki, Respublika Fövqəladə Hallar və Kənd Təsərrüfatı nazirlikləri Şəki Şəhər İcra Hakimiyyəti ilə birgə yanğın təhlükəsizliyi tədbirlərinə həsr olunmuş zona seminar-müşavirəsi keçirmişdir.
Tədbirdə Şəki-Zaqatala bölgəsi rayonlarının yanğın təhlükəsizliyi xidmətlərinin rəisləri, dövlət texniki nəzarət müfəttişləri, taxıl istehsalçıları, fermerlər, habelə yerli icra nümayəndəliklərinin və bələdiyyə orqanlarının rəhbərləri iştirak etmişlər.
Şəki Şəhər İcra Hakimiyyəti başçısının müavini Şahin Babayev tədbirin cari ildə Şəki-Zaqatala bölgəsi rayonlarında dənli və texniki bitkilərin yığımı, daşınması, saxlanması və emalı dövründə yanğın təhlükəsizliyi qaydalarına düzgün əməl edilməsi barədə əlaqədar qurumları və fermerləri təlimatlandırmaq məqsədi daşıdığını bildirmişdir.
Seminarda Fövqəladə Hallar Nazirliyinin şöbə müdiri Cəlil Quliyev “Yerlərdə yanğından mühafizə tədbirlərinin təşkili” mövzusunda məruzə etmişdir. Məruzədə taxıl və ot tədarükünə hazırlıq dövründə, habelə dənli bitkilərin yetişmə və məhsul yığımı zamanı yanğın təhlükəsizliyi qaydalarına ciddi əməl olunması və hadisə baş verən zaman həyata keçiriləcək təxirəsalınmaz tədbirlər geniş əksini tapmışdır.
Seminarda Kənd Təsərrüfatı Nazirliyinin məsul işçisi Vahid Zərgərov da çıxış etmişdir.
Sonda iştirakçıları maraqlandıran suallara aydınlıq gətirilmişdir.
Bölmənin digər xəbərləri
