Selcan Maqsudova: İnanıram ki, dünya kuboku turnirində uğurla çıxış edib tamaşaçıları sevindirəcəyəm
Bakı, 8 fevral, AZƏRTAC
Bakıda, Milli Gimnastika Arenasında keçiriləcək batut gimnastikası və tamblinq üzrə dünya kuboku turnirinə ciddi hazırlıq işləri gedir. Özümə inanıram. Ümid edirəm ki, dünya kuboku turnirində proqramımı uğurla icra edəcəyəm.
AZƏRTAC xəbər verir ki, bu sözləri fevralın 15-16-da Milli Gimnastika Arenasında keçiriləcək batut gimnastikası və tamblinq üzrə dünya kuboku yarışlarında ölkəmizi təmsil edəcək Selcan Maqsudova jurnalistlərə müsahibəsində deyib.
Batut gimnastikası yarışlarında çıxış edəcək S.Maqsudova əsas hədəfinin final mərhələsinə yüksəlmək olduğunu deyən təmsilçimiz bildirib ki, rəqiblərim kifayət qədər güclüdür. Onlar arasında Olimpiya çempionları da var. İnanıram ki, uğurla çıxış edib Milli Gimnastika Arenasına gələcək tamaşaçıları sevindirəcəyəm.
Tokio Olimpiya Oyunlarına lisenziya xarakteri daşıyan turnirdə 30 ölkə iştirakını təsdiqləyib. Yarışlarda 150 gimnast birincilik uğrunda mübarizə aparacaq.
Bölmənin digər xəbərləri
