“SƏLİS Könüllüləri” İctimai Birliyinin təsis konfransı keçirilib
Bakı, 27 avqust, AZƏRTAC
“SƏLİS Könüllüləri” İctimai Birliyinin təsis konfransı keçirilib. Onlayn formada keçirilən konfransda İctimai Birliyin 243 üzvü iştirak edib.
AZƏRTAC-ın məlumatına görə, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, deputat Azay Quliyev konfransda çıxış edərək bildirib ki, “SƏLİS Könüllüləri” İctimai Birliyi Prezident İlham Əliyevin ölkəmizdəki könüllü təşkilatlarının fəaliyyətinin təkmilləşdirilməsi, Azərbaycanın ictimai həyatında fəallığının artırılmasına dair çağırışlarını və müvafiq tapşırıqlarını rəhbər tutaraq şuranın təşəbbüsü ilə yaradılıb. 2020-ci ilin fevral ayından etibarən “SƏLİS Könüllüləri” İctimai Birliyinin Təşkilat Komitəsi fəaliyyət göstərir. Azay Quliyev Prezident İlham Əliyevin 30 dekabr 2020-ci il tarixli Sərəncamı ilə 2020-ci ilin “Könüllülər ili” elan edilməsinin son illərdə ölkəmizdə onlarla mötəbər beynəlxalq tədbirin təşkilində yaxından iştirak edən, könüllü ruhu ilə Azərbaycanın inkişafına töhfə verən insanların əməyinə verilən yüksək qiymət olduğunu vurğulayıb. “SƏLİS Könüllüləri”nə uğurlar arzulayan şuranın sədri onların fəaliyyətinin vətəndaş cəmiyyətində könüllük hərəkatını daha da genişləndirəcəyinə inandığını bildirib: “SƏLİS könüllüsü ölkənin ictimai həyatında aktiv rol oynamalı, kreativ ideyalarla çıxış etməli, beynəlxalq arenada ölkəmizi və mənsub olduğu təşkilatı layiqli təmsil etməlidir. Bunun üçün sizin geniş imkanlarınız var. Ümid edirəm ki, qısa zaman ərzində siz ideya və layihələrinizlə Azərbaycanda gedən gənclər siyasətinə öz töhfənizi verəcəksiniz”.
Azərbaycan Respublikası Gənclər Fondunun icraçı direktoru Fərid Cəfərov konfransda çıxış edərək dövlət gənclər siyasətinin prioritetlərindən danışıb. O, Azərbaycanda gənclərin hərtərəfli inkişafı üçün yaradılan şəraitin Avropada nümunəvi model olduğunu bildirib. İcraçı direktor ölkəmizdə böyük vüsət alan könüllülük hərəkatının sıralarının 2020-ci il “Könüllülər ili” çərçivəsində daha da genişləndiyini və könüllülərin pandemiyaya qarşı mübarizədə də ön sıralarda yer aldığını deyib. Fərid Cəfərov bu günlərdə könüllülər təşkilatlarının fəaliyyətinin koordinasiyasının təşkili məqsədilə Azərbaycan Könüllü Təşkilatları İttifaqının yaradıldığını bildirərək Gənclər Fondunun bu sahədə çalışan təşkilatlara dəstək verəcəyini bildirib.
Azərbaycan Könüllü Təşkilatları İttifaqının sədri Tural Hümbətov və ASAN Könüllüləri İctimai Birliyinin sədri Səbinə Cabbarova konfransda çıxış edərək ölkədə könüllülük hərəkatının əhəmiyyətini qeyd ediblər. QHT sədrləri “SƏLİS Könüllüləri” İctimai Birliyinə uğurlar arzulayaraq birgə əməkdaşlığa hazır olduqlarını qeyd ediblər.
Sonra gündəlikdə dayanan məsələlərə - SƏLİS Könüllüləri İctimai Birliyinin təsis qurultayının sədrinin, katibinin və səs komissiyasının üzvlərinin seçilməsi, “SƏLİS Könüllüləri” İctimai Birliyinin təsis olunması, Nizamnaməsinin müzakirəsi və qəbul edilməsi, İctimai Birliyin İdarə Heyətinin və Mərkəzi Nəzarət-Təftiş Komitəsinin üzvlərinin seçilməsi məsələlərinə baxılıb.
Xudaverdi Quliyev, Aydan Nurəhmədova, Rauf Sadıqov, Zərnigar İslamova, Sara Quliyeva, Aytac Zülfiqarlı, Kənan Zeynalov, Şamxal Qənizadə, Arif Mikayılov, Yusif Vəliyev və Namiq Musayev İctimai Birliyin İdarə Heyətinin üzvləri seçiliblər.
Fatimə Zülfiqarlı, Nahid Əliyev, Fəqan Hüseynli, Gülnar Həsənova və Fəridə Heybətova isə İctimai Birliyin Nəzarət Təftiş Komitəsinin üzvləri seçiliblər.
Bölmənin digər xəbərləri
