Serbiyanın sabiq və yeni Baş nazirləri ölkədəki siyasi və iqtisadi vəziyyəti müzakirə ediblər
Belqrad, 3 may, AZƏRTAC
Serbiyanın keçmiş Baş naziri, hazırda Serbiya Tərəqqi Partiyasının rəhbəri olan Milos Vuçeviç və yeni Baş nazir Duro Macut ölkədəki siyasi və iqtisadi vəziyyəti müzakirə ediblər.
AZƏRTAC xəbər verir ki, Serbiya hökumətinin məlumatına görə, Duro Macut və Milos Vuçeviçin görüşündə ölkədəki hazırki siyasi və iqtisadi vəziyyət, eləcə də Serbiyanın davamlı inkişafı və vətəndaşların həyat səviyyəsinin yaxşılaşdırılmasına yönəlmiş layihələr barədə müzakirələr aparılıb.
Duro Macut bildirib ki, yeni hökumətin qarşıdakı dövrdə prioriteti bu istiqamətdə fəaliyyəti gücləndirmək olacaq.
Milos Vuçeviç isə qeyd edib ki, yeni Baş nazirlə görüşdə Serbiyanın gələcək inkişafı, tərəqqisi və bütün vətəndaşları üçün daha da yaxşı həyat naminə ən vacib məqsədlər razılaşdırılıb.
Xatırladaq ki, Serbiya Milli Assambleyası martın 19-da Baş nazir Milos Vuçeviç və hökumətin istefasını təsdiqləyib. Milos Vuçeviç və bir neçə nazir keçən il noyabrın 1-də Novi Sad şəhərindəki dəmir yolu vağzalında 15 nəfərin öldüyü, 2 nəfərin ağır yaralandığı qəzaya görə tələbələrin keçirdiyi etiraz aksiyaları fonunda istefa vermişdilər.
Serbiya Prezidenti Aleksandar Vuçiç aprelin 6-da yeni hökuməti formalaşdırmağı professor Duro Macuta tapşırıb. Serbiya parlamenti isə aprelin 16-da Duro Macutun Baş nazir vəzifəsinə təyin edilməsini təsdiqləyib.
Nihad Budaqov
AZƏRTAC-ın xüsusi müxbiri
Belqrad
Bölmənin digər xəbərləri
