Səudiyyə Ərəbistanı orqan donorluğu sahəsində dünya üzrə üçüncü yerdədir
Qahirə, 3 may, AZƏRTAC
Səudiyyə Ərəbistanı Krallığı canlı donorlardan orqan bağışlanması göstəricilərinə görə dünyada üçüncü yer tutur. Ötən il 2023-cü illə müqayisədə canlı donorların sayı təxminən 4,9 faiz artıb. 2024-cü ildə 1706 orqan köçürülməsi əməliyyatı həyata keçirilib.
AZƏRTAC “əl-Arabiyyə” telekanalına istinadla xəbər verir ki, bu rəqəmlər Donorluq və Orqan Nəqli üzrə Qlobal Müşahidə Mərkəzinin (GODT) hesabatında yer alır.
Qeyd olunub ki, canlı donorlar tərəfindən ən çox bağışlanan orqan böyrəkdir. Səudiyyə Orqan Nəqli Mərkəzinin məlumatına görə, ötən il 1284 böyrək bağışlanıb. Eyni dövrdə isə qaraciyərin bir hissəsinin nəqli üzrə 422 əməliyyat həyata keçirilib.
Mərkəzin açıqlamasına görə, Səudiyyə Ərəbistanında ölümündən sonra orqanlarını bağışlamaq istəyənlərin sayı 540 minə çatıb. Ötən il vəfat etmiş donorların orqanlarının köçürülməsi əməliyyatlarında da 12,3 faiz artım qeydə alınıb. Həmin dövrdə 393 orqan vəfat etmiş şəxslərdən xəstələrə köçürülüb.
Səudiyyə Ərəbistanında orqan donorluğu və nəqli əməliyyatlarını təkmilləşdirmək, eləcə də səhiyyə sektorları və əlaqədar qurumlar arasında inteqrasiyanı gücləndirmək və faydalanan şəxslərə kompleks tibbi xidməti təmin etmək məqsədilə “Əsər” adlı rəqəmsal platforma istifadəyə verilib.
Bölmənin digər xəbərləri
