Səudiyyə Ərəbistanının “Əl-Cəzirə” qəzetində Azərbaycanın üzləşdiyi mina probleminə dair məqalə dərc olunub
Qahirə, 31 dekabr, AZƏRTAC
Səudiyyə Ərəbistanının “əl-Cəzirə” qəzetinin bugünkü nömrəsində Azərbaycanın ər-Riyaddakı səfiri Şahin Abdullayevin məqaləsi dərc edilib.
AZƏRTAC xəbər verir ki, “Azərbaycanda minatəmizləmə fəaliyyətləri: prioritetlər və ehtiyaclar” sərlövhəli məqalədə ölkəmizin üzləşdiyi mina problemi, o cümlədən mina hadisələrinin qurbanları, minatəmizləmə sahəsində səylərindən bəhs olunur. Yazıda qeyd edilir ki, Azərbaycanın işğaldan azad olunmuş əraziləri dünyanın piyada və tank əleyhinə mina və partlamamış hərbi sursatla ən çox çirklənmiş ərazilərindən biridir. İlkin hesablamalara görə, Ermənistan bu ərazilərdə təqribən 1.5 milyon mina basdırıb. Amma bu rəqəm son deyil, yeni axtarışlar və tapıntılar nəticəsində arta bilər.
Məqalədə vurğulanır ki, Azərbaycan minalardan azad bir dünya yaradılması fikrini dəstəkləyir. Lakin bu, yalnız bir ölkənin deyil, bütün beynəlxalq ictimaiyyətin məsuliyyətidir. Prezident İlham Əliyevin qeyd etdiyi kimi, dünyada mina terroruna son qoymaq üçün beynəlxalq səylər artırılmalıdır.
Müəllif, həmçinin qeyd edir ki, Azərbaycan humanitar minatəmizləməni milli Dayanıqlı İnkişaf Məqsədi kimi elan edib. Ölkəmiz humanitar minatəmizləməni BMT-nin Dayanıqlı İnkişaf Məqsədlərindən biri kimi irəli sürür və bu təşəbbüsü fəal şəkildə təşviq edir. Bununla yanaşı, Azərbaycan Minaların Təsirinə Məruz Qalmış Ölkələrin Həmfikirlər Qrupunun yaradılması təklifi ilə çıxış edir.
Yazıda ölkəmizin minatəmizləmə sahəsində səyləri də qeyd olunur. Diqqətə çatdırılır ki, 2020-ci ilin noyabrından bəri Azərbaycan dövlət büdcəsindən ərazilərimizin minalardan təmizlənməsi üçün təxminən 200 milyon ABŞ dolları ayırıb. Dövlətimiz mina qurbanlarının reabilitasiyası və cəmiyyətə reinteqrasiyası üçün bir sıra tədbirlər görür. Eyni zamanda, onları müasir protezlər, motorlu təkərli arabalar, sosial və psixoloji xidmətlər daxil olmaqla reabilitasiya avadanlıqları ilə təmin edir.
Bildirilir ki, minalar Azərbaycanda humanitar təhdid olaraq qalır, ölkə əhalisinin təxminən 10 faizini, yəni təxminən 1 milyon insanı təhdid edir. Bu insanlar əsasən doğma yurdlarına təhlükəsiz şəkildə qayıda bilməyən keçmiş məcburi köçkünlərdir. 2020-ci ilin noyabrında üçtərəfli Bəyanat imzalanandan sonra Ermənistan tərəfindən Azərbaycan torpaqlarına yerləşdirilən minalar nəticəsində 350-dən çox insan həyatını itirib və ya ağır yaralanıb.
Qeyd olunur ki, Azərbaycan mina təhlükəsi ilə məlumatlandırma fəaliyyətlərində yaxından iştirak edir. 2024-cü il mayın 30-31-də Bakıda “Minaların ətraf mühitə təsirinin azaldılması: Təhlükəsiz və yaşıl gələcək üçün resursların səfərbər olunması” mövzusuna həsr edilmiş III Beynəlxalq Minatəmizləmə Konfransında ölkəmizin bu sahədə səyləri təqdim olunub. Dövlətimiz, həmçinin bu mövzu ilə bağlı Ottava Konvensiyasına qoşulub.
Məqalədə o da vurğulanır ki, Səudiyyə Ərəbistanı Azərbaycanla humanitar minatəmizləmə sahəsində əməkdaşlıq etməyə qərar vermiş ilk dövlətlərdən biridir. Bu məqsədlə 2024-cü il yanvarın 16-da Azərbaycan Respublikası Minatəmizləmə Agentliyi (ANAMA) və Kral Salman Humanitar Yardım Mərkəzi arasında Maliyyə Yardımı Memorandumu imzalanıb.
Səudiyyə Mərkəzinin baş direktoru, müşavir Abdullah bin Əbdüləziz ər-Rəbiə Bakıda “Minaların ətraf mühitə təsirinin azaldılması: Təhlükəsiz və yaşıl gələcək üçün resursların səfərbər olunması” mövzusuna həsr edilmiş III Beynəlxalq Minatəmizləmə Konfransında çıxışında ölkəsinin humanitar minatəmizləmə əməliyyatlarında iştirak etməkdə maraqlı olduğunu bildirib.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
