SİYASƏT
Sevinc Fətəliyeva: Azərbaycanın beynəlxalq müstəvidə mövqeləri getdikcə möhkəmlənməkdədir
Bakı, 14 yanvar, AZƏRTAC
Azərbaycan Prezidenti İlham Əliyev yerli televiziya kanallarına müsahibəsində ölkədə və regionda baş verən proseslərlə bağlı geniş və əhatəli fikirlərini bildirib. Belə ki, dövlətimizin başçısı müsahibədə jurnalistlərin Azərbaycanda 2021-ci ildə iqtisadi, sosial sahələrdə görülən işlərə, Azərbaycan ilə Ermənistan arasındakı münasibətlərə, işğaldan azad edilmiş ərazilərdə aparılan yenidənqurma işlərinə, ölkəmizin xarici siyasətinə və digər məsələlərə dair suallarını ətraflı şəkildə cavablandırıb. Müsahibədə postmüharibə dövründə baş verən proseslərə də xüsusi diqqət yetirilir.
Bu fikirləri AZƏRTAC-a açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.
Deputat bildirib ki, hazırda Ermənistanda revanşist meyillər hələ də var. Dövlət başçısının dediyi kimi, bu meyillər təkcə keçmiş hakimiyyət təmsilçiləri tərəfindən deyil, eyni zamanda, indiki iqtidar nümayəndələri tərəfindən də özünü büruzə verir. Çünki 44 günlük Vətən müharibəsindən sonrakı dövr ərzində biz dövlət sərhədində ermənilərin hərbi təxribatlar törətdiyinin şahidi oluruq. Məlumdur ki, Ermənistan hakimiyyəti və cəmiyyəti müharibədəki məğlubiyyətindən hələ özünə gələ bilməyib. Bu məğlubiyyət onlara çox güclü psixoloji zərbə vurub, onların ideoloji əsasları darmadağın edilib. Yəni, onların uydurduqları və özləri inandıqları bütün miflər dağıdılıb. Bu səbəbdən də revanşist meyillər bütövlükdə Ermənistan cəmiyyətində mövcuddur.
S.Fətəliyeva qeyd edib ki, Ermənistanın Zəngəzur dəhlizinin açılmasına qarşı çıxması da nəticəsiz oldu: “Prezident İlham Əliyev müsahibəsində bu məqama toxunaraq vurğuladı ki, Ermənistan istəsə də, istəməsə biz bunu edəcəyik. Azərbaycanın atdığı diplomatik addımlar, eyni zamanda, bölgədə gedən proseslər göstərir ki, bunu artıq təkcə Azərbaycan yox, bir çox region ölkələri istəyir. Dövlətimizin başçısı Ermənistanın mövqeyində dəyişiklik baş verdiyini qeyd edərək vurğuladı ki, onlar elə bilməsin ki, biz daim onlardan sülh tələb edəcəyik. Hər halda itirən tərəf Ermənistan olacaq.
Deputat diqqətə çatdırıb ki, Azərbaycan BMT-nin Nizamnaməsi, Helsinki Yekun Aktı çərçivəsində yeni reallıq yaradıb və hamı bu reallıqla hesablaşmalıdır: “Biz görürük ki, beynəlxalq birlik artıq bu reallıqlarla barışmaqdadır. Bu gün BMT, Qoşulmama Hərəkatı, ATƏT, Avropa İttifaqı, MDB bu reallıqları tamamilə qəbul ediblər. Prezident İlham Əliyev ATƏT-in Minsk qrupunun gələcəyi ilə bağlı da fikirlərini bölüşüb. Dövlətimizin başçısı deyib ki, onlar Dağlıq Qarabağ münaqişəsi ilə məşğul olmamalıdırlar, çünki bu münaqişə həll olunub. Onlar bu yeni reallığı qəbul etməlidirlər. Bilməlidirlər ki, onlar bundan sonra Qarabağ məsələsi ilə məşğul olmayacaqlar. Həmsədrlər bundan sonra nə ilə məşğul olmalarını özləri fikirləşməlidirlər. Bütövlükdə, Azərbaycan beynəlxalq müstəvidə mövqeləri getdikcə möhkəmləndirir. Bu amil ölkəmizin regionda yaratdığı reallıqların ardıcıl olaraq həyata keçəcəyini deməyə əsas verir”.