CƏMİYYƏT
SİLAHLI QÜVVƏLƏRİN 84-CÜ İLDÖNÜMÜNƏ HƏSR EDİLMİŞ TƏNTƏNƏLİ MƏRASİM
İyunun 25-də “Gülüstan” sarayında Azərbaycan Respublikası Silahlı Qüvvələrinin 84-cü ildönümünə həsr edilmiş təntənəli mərasim keçirilmişdir.
Müdafiə Nazirliyinin hərbi orkestrinin ifasında respublikamızın dövlət himni səsləndi.
Prezidentin İcra Aparatının rəhbəri Ramiz Mehdiyev Azərbaycan Respublikasının Prezidenti Heydər Əliyevin Silahlı Qüvvələrin şəxsi heyətinə təbrik məktubunu oxudu.
Azərbaycan Respublikasının müdafiə naziri general-polkovnik SƏFƏR ƏBİYEV mərasimdə çıxış etdi. Nazir mərasim iştirakçılarını, Silahlı Qüvvələrin şəxsi heyətini və xalqımızı Azərbaycan Respublikası Silahlı Qüvvələrinin 84-cü ildönümü münasibətilə təbrik edərək dedi ki, Silahlı Qüvvələr günü Prezidentin Fərmanı ilə hər il dövlət və xalq bayramı kimi qeyd edilir. XX əsrin sonunda öz dövlət müstəqilliyini bərpa etmiş Azərbaycan Respublikasının Silahlı Qüvvələri 1918-ci il iyunun 26-da yaradılmış Azərbaycan Xalq Cümhuriyyətinin Milli Ordusunun layiqli varisidir.
Bu il Milli Qurtuluş günü Azərbaycan Silahlı Qüvvələrinin şəxsi heyəti üçün ikiqat bayram oldu. Çünki həmin günlər Silahlı Qüvvələrin Ali Baş Komandanı Naxçıvan Muxtar Respublikasında tarixi əhəmiyyətli görüşlər keçirirdi və belə görüşlərdən biri də “N” hərbi hissəsində oldu.
Prezident Heydər Əliyev görüş zamanı demişdir: “Azərbaycan Ordusu dövlət müstəqilliyimizin ən dəyərli töhfələrindən biridir. Azərbaycan dövlətinin ən böyük dayağı, onun sütunu Azərbaycan Silahlı Qüvvələridir. Azərbaycanın dövlət müstəqilliyinin ən dəyərli nəticələrindən biri Azərbaycanın Milli Ordusunun yaranması, təşkil olunması və onun müasir tələblərə uyğun hazırlanmasıdır”.
Xalqımız Silahlı Qüvvələr quruculuğuna 1991-ci ilin oktyabrında müstəqqilliyini bərpa etdikdən dərhal sonra başlamışdır. Tarix baxımından bu, çox müddət deyildir. Lakin bu illər ərzində Azərbaycan Silahlı Qüvvələri quruculuğu sahəsində elə böyük işlər görülmüşdür ki, bunlar zaman ölçüsü çərçivəsinə sığmır. Əgər nəzərə alsaq ki, hərbi quruculuq, əslində, 1993-cü il noyabrın 2-də cənab Heydər Əliyevin xalqa tarixi müraciətindən sonra başlamışdır, onda ordu quruculuğu sahəsində görülən işlər daha böyük məna kəsb edəcəkdir.
Azərbaycan Silahlı Qüvvələrinin quruculuğu Prezidentimiz Heydər Əliyevin daim diqqət mərkəzindədir. Təkcə son bir il ərzində onun qanunvericilik təşəbbüsləri, imzaladığı fərmanlar, sərəncamlar, verdiyi əmr və tapşırıqlar ordu quruculufğuna güclü təkan vermişdir.
Azərbaycan Silahlı Qüvvələrinin quruculuğu planlı surətdə davam etdirilir. Qoşunların döyüşə və səfərbərliyə hazırlığı, döyüş və mənəvi psixoloji hazırlığı, idarəetmə orqanlarının hazırlanması, hərbi kadrların hazırlanması və yerləşdirilməsi, beynəlxalq hərbi əməkdaşlıq Silahlı Qüvvələrin illik hazırlıq planı, müdafiə nazirinin təşkilat-metodiki göstərişləri və digər direktiv sənədlər əsasında həyata keçirilir.
Cari ildə Silahlı Qüvvələrin bütün növlərində komanda-qərargah və real döyüş şəraitinə yaxınlaşdırılmış səhra təlimləri keçirilmiş, qoşunların döyüşə və səfərbərliyə hazırlığı yüksək səviyyədə saxlanılmışdır. Zabitlərin peşə hazırlığının səviyyəsi əhəmiyyətli dərəcədə yüksəlmişdir.
Silahlı Qüvvələrin şəxsi heyətinin mənəvi - psixoloji, hərbi və əxlaqi tərbiyəsi məsələləri ön plana çəkilmişdir. Şəxsi heyətin Vətənə sədaqət ruhunda tərbiyə olunması, hərbi - siyasi təzyiqlərə müqavimət göstərməyi bacarması ordunun döyüş qabiliyyətini şərtləndirən əsas amillərdəndir. Onun mənəvi psixoloji hazırlığı, döyüş qabiliyyətinin artırılması və hərbi intizamın möhkəmləndirilməsi istiqamətində görülən işlər cari ildə daha da gücləndirilmişdir. İctimai təşkilatlarla səmərəli əlaqə yaradılaraq müharibə veteranlarının, ziyalıların, elm və mədəniyyət xadimlərinin təcrübəsindən, xalqımızın mənəvi dəyərlərindən geniş istifadə edilmişdir.
Nazir bildirdi ki, Silahlı Qüvvələrin şəxsi heyətlə komplektləşdirilməsi Ali Baş Komandanın göstərişlərinə və Azərbaycan Respublikasının hərbi qanunvericilik aktlarının tələblərinə uyğun olaraq həyata keçirilir.
Əsas komanda-qərargah vəzifələrinə peşəkar, ali hərbi təhsili olan, mənəvi, fiziki və psixoloji cəhətdən hazırlıqlı, döyüş təcrübəsi olan zabitlərin təyin edilməsi diqqət mərkəzində olmuşdur. 2001-ci ilin avqust ayında Azərbaycan Ali Hərbi Məktəbinin müasir standartlara uyğun yeni proqramla hazırlanmış məzunlarının ilk buraxılışı bu işin bundan sonra daha keyfiyyətlə görülməsinə şərait yaradacaqdır.
İftixarla deyə bilərik ki, son illərdə Silahlı Qüvvələrdə müasir tələblərə uyğun aparılan islahatlar nəticəsində respublikada yeni hərbi təhsil sistemi yaradılmışdır. Cari tədris ilində Silahlı Qüvvələr Akademiyasında iki illik proqram üzrə təhsil alan zabitlərin, Təlim və tədris mərkəzində zabit ixtisas kurslarının, ehtiyat zabitlər hazırlığı kursunun, Azərbaycan Ali Hərbi Təyyarəçilik Məktəbi məzunlarının yeni proqram üzrə ilk buraxılışları olacaqdır. Azərbaycan Tibb Universitetinin hərbi tibb fakültəsinin ilk buraxılışı isə bu yaxınlarda olmuşdur. Bu ilin payızında Cəmşid Naxçıvanski adına Hərbi Litseyin 30 illik yubileyi qeyd ediləcəkdir.
Müdafiə naziri bildirdi ki, Silahlı Qüvvələr üçün tələb olunan silah, hərbi texnika, döyüş sursatı, arxa xidmət əmlakı və digər maddi vasitələr Azərbaycan Respublikasının sənaye müəssisələrində istehsal olunmuşdur.
Azərbaycan Silahlı Qüvvələrinin beynəlxalq əlaqələri daha da genişlənmişdir. NATO, MDB və GUAM çərçivəsində, habelə bəzi dövlətlərlə ikitərəfli hərbi əməkdaşlığın əsasları qoyulmuşdur. Azərbaycan Respublikasının 1994-cü ilin mayında NATO-nun “Sülh naminə tərəfdaşlıq” proqramına qoşulması, 1996-cı ilin aprelində isə Azərbaycan Respublikası Prezidentinin NATO-nun baş katibinə Azərbaycanın prezentasiya sənədlərinin təqdim etməsi Şimali Atlantika İttifaqı ilə əməkdaşlıqda yeni mərhələnin başlanğıcı idi.
Silahlı Qüvvələrimizdə sülhməramlı tabor yaradılmış və 1999-cu ilin sentyabrından onun bir taqımı Türkiyə Respublikası taborunun tərkibində Kosovoda beynəlxalq sülhyaratma missiyasını yerinə yetirir. Hazırda Azərbaycan Respublikası Silahlı Qüvvələrinin sülhməramlı bölməsinin Əfqanıstanda Təhlükəsizliyin dəstəklənməsi üzrə beynəlxalq qüvvələrin tərkibinə göndərilməsi planlaşdırılır.
Azərbaycan Respublikasının NATO ilə Tərəfdaşlıq Fərdi Proqramı xeyli genişlənmişdir və çoxmilli sülhyaratma təlimləri də daxil olmaqla, birgə tədbirlərin keçirilməsi nəzərdə tutulur. Belə ki, ötən ilin noyabrında NATO üzvü olan və tərəfdaş dövlətlərin iştirakı ilə Bakıda “Kooperativ Determineyşn-2001” çoxmilli komanda-qərargah təlimləri keçirilmişdir. 2004-cü ildə isə “Kooperativ Best Effort” çoxmilli real səhra təlimlərinin keçirilməsi planlaşdırılır.
“Azadlığa Dəstək Aktı”na 907-ci düzəlişin qüvvəsi müəvəqqəti dayandırıldıqdan sonra Azərbaycan və ABŞ arasında müdafiə sahəsində birgə bəyanat imzalanmış, hərbi əməkdaşlığın əsas istiqamətləri müəyyənləşdirilmişdir. Bu yaxınlarda Azərbaycan Müdafiə Nazirliyinin nümayəndə heyəti Belçikada NATO-nun Avropadakı Birləşmiş Silahlı Qüvvələrinin komandanı - Amerika Birləşmiş Ştatlarının Avropadakı Silahlı Qüvvələrinin Ali Baş Komandanı general Cozef Ralstonla görüşmüşdür. Görüş zamanı Azərbaycan-NATO və Azərbaycan-ABŞ ikitərəfli hərbi əməkdaşlıq məsələləri ətraflı müzakirə olunmuşdur.
Azərbaycan və Türkiyə silahlı qüvvələri arasında əməkdaşlıq da uğurla inkişaf etdirilir.
Prezident Heydər Əliyev Naxçıvanda “N” hərbi hissəsində keçirilən görüşdə demişdir: “... Azərbaycanın müasir tələblərə uyğun güclü, qüdrətli ordusu var. Ancaq bu da son hədd deyildir. Biz ordumuzu daha da gücləndirməliyik. Onu müasir silahlarla daha çox silahlandırmalıyıq. Ordumuzun zabit korpusu öz peşəkarlığını daha da artırmalıdır. Bu gün mən bizim ordumuzu, onun səviyyəsini, onun döyüş qabiliyyətini yüksək qiymətləndirirəm”.
Silahlı Qüvvələrimizə verdiyi yüksək qiymətə görə, Prezidentimiz cənab Heydər Əliyevə bütün şəxsi heyət adından və öz adımdan minnətdarlığımızı bildirirəm. Bəyan edirəm ki, Silahlı Qüvvələrdə xidmət edən hər bir şəxs Ali Baş Komandanın diqqət və qayğısını daim hiss edir və duyur. Çalışırıq ki, xalqımızın və Prezidetimizin Silahlı Qüvvələrə olan inam və etimadını layiqincə doğruldaq.
Nazir çıxışının sonunda dedi: Silahlı Qüvvələrin qarşısında Azərbaycanın erməni işğalçıları tərəfindən zəbt olunmuş torpaqlarını azad etmək kimi müqəddəs və məsuliyyətli bir vəzifə durur. Hər bir əsgər, zabit və general bu müqəddəs vəzifəni şərəflə yerinə yetirmək üçün hər gün çalışır. Əmin edirəm ki, əgər torpaqlarımız diplomatik yolla azad olunmazsa, Silahlı Qüvvələrimiz xalqımızın iradəsini əsas tutaraq, Azərbaycan Respublikasının Prezidenti, Silahlı Qüvvələrin Ali Baş Komandanı cənab Heydər Əliyevin hər bir əmrini yerinə yetirməyə hazırdır.
X X X
Mərasimdə Milli Məclisin sədri Murtuz Ələsgərov, baş nazir Artur Rasizadə, parlamentin deputatları, səfirlər, paytaxt ictimaiyyətinin nümayəndələri iştirak edirdilər.