Şirvan, 24 may, Aydın Yavərzadə, AZƏRTAC

Şirvan şəhərində “Şəhərdaxili hərəkət (mobillik) planın hazırlanması” məqsədilə Şirvan Şəhər İcra Hakimiyyəti və Azərbaycan Texniki Universiteti (AzTU) arasında müqavilə imzalanıb.

AZƏRTAC-ın bölgə müxbiri xəbər verir ki, bu münasibətlə keçirilən görüşdən öncə Ulu Öndər Heydər Əliyevin abidəsi ziyarət edilib.

Görüşdə çıxış edən Şirvan Şəhər İcra Hakimiyyətinin başçısı İlqar Abbasov və Azərbaycan Texniki Universitetinin rektoru Vilayət Vəliyev bildiriblər ki, müqavilə dayanıqlı inkişaf məqsədlərinin ardıcıl həyata keçirilməsi üçün Azərbaycan Respublikası Prezidentinin 2018-ci il 27 dekabr tarixli Sərəncamı ilə təsdiq edilmiş “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”nın həyata keçirilməsi üzrə Tədbirlər Planı”nın 7.4.6.1-ci yarımbəndinin icrasını təmin etmək məqsədilə Nazirlər Kabinetinin 2022-ci il 22 yanvar tarixli “Şəhərdaxili hərəkət (mobillik) planın hazırlanması” qərarına uyğun işlərin görülməsini nəzərdə tutur.

İcrasına başlanılan layihə Prezident İlham Əliyevin rəhbərliyi ilə bu sahədə həyata keçirilən işlərin tərkib hissəsi olaraq, 2030-cu ilədək yerli tərəfdaşlarla birlikdə ictimai nəqliyyatın genişləndirilməsi yolu ilə yol təhlükəsizliyinin yaxşılaşdırılmasını özündə ehtiva edir.

“Dövlət-universitet-sənaye” tandeminin bariz nümunəsi olan “Şəhərdaxili hərəkət (mobillik) planının hazırlanması” üzrə məsləhət xidməti layihəsi Şirvan Şəhər İcra Hakimiyyəti və Azərbaycan Texniki Universitetinin birgə həyata keçirəcəyi ilk layihədir. İlkin olaraq AzTU-nun nəqliyyat istiqaməti üzrə professor-müəllim heyətinin cəlb edilməsi ilə həyata keçirilməsi planlaşdırılan layihə üzrə başlanğıc görüş keçirilib, ilkin müzakirələr və layihənin gedişatına dair fikir mübadiləsi aparılıb.