Siyasi şərhçi: Zəngəzur və Orta Dəhliz Naxçıvanın iqtisadi modelini dəyişəcək
Bakı, 13 avqust, AZƏRTAC
Naxçıvanın bugünkü əhəmiyyətini yalnız muxtar respublikanın coğrafi mövqeyi və sosial-iqtisadi inkişafı ilə məhdudlaşdırmaq düzgün olmazdı. Azərbaycanın İkinci Qarabağ müharibəsində qazandığı tarixi Zəfərdən sonra Cənubi Qafqazda yaranmış yeni reallıqlar Naxçıvanı regionun gələcək nəqliyyat, logistika və iqtisadi arxitekturasının mühüm elementinə çevirib.
Bu fikirləri AZƏRTAC-a açıqlamasında siyasi şərhçi Xəyal Bəşirov deyib.
Ekspert bildirib ki, Prezident İlham Əliyevin Vətən müharibəsindən sonra irəli sürdüyü mühüm qlobal təşəbbüslərdən biri Zəngəzur dəhlizi layihəsidir. Bu layihə Azərbaycanın Şərq-Qərb nəqliyyat dəhlizində rolunu daha da gücləndirir. Azərbaycan Şimal-Cənub, Şimal-Qərb və Şərq-Qərb istiqamətlərinin, eləcə də Trans-Xəzər marşrutunun üzərində yerləşən ölkə kimi böyük nəqliyyat layihələrinin reallaşdırılması üçün unikal imkanlara malikdir. Dövlətimiz Prezident İlham Əliyevin rəhbərliyi ilə bu imkanlardan milli maraqlarımıza uyğun şəkildə yüksək səviyyədə istifadə edir. Zəngəzur dəhlizi ilk növbədə Azərbaycan üçün ölkənin əsas hissəsi ilə Naxçıvan arasında birbaşa quru bağlantısının yaradılması deməkdir. Bu məsələ Azərbaycan xalqı və dövləti üçün uzun illərdir mövcud olan tarixi problemin həlli baxımından xüsusi əhəmiyyət daşıyır. Azərbaycanın əsas hissəsini Naxçıvanla birləşdirən yolun bərpası bizim üçün yalnız iqtisadi və nəqliyyat layihəsi deyil, həm də tarixi və ədalətli haqqımızdır. Azərbaycan beynəlxalq səviyyədə tanınmış sərhədlərə və ərazi bütövlüyünə hörmət etdiyini daim nümayiş etdirir, eyni zamanda öz qanuni hüquq və maraqlarının təmin olunması istiqamətində ardıcıl siyasət aparır. Zəngəzur dəhlizinin reallaşdırılmasına maraq yalnız Azərbaycanla məhdudlaşmır. Layihənin tam fəaliyyətə başlaması Şərq və Qərb, Asiya və Avropa arasında yeni iqtisadi və nəqliyyat imkanlarının yaranmasına şərait yarada bilər. Bu baxımdan layihənin region dövlətləri ilə yanaşı, daha geniş coğrafiyada yerləşən ölkələr üçün də iqtisadi əhəmiyyəti var. Prezident İlham Əliyevin Naxçıvana son səfəri zamanı yeni layihələrin təməlinin qoyulması, obyektlərin istifadəyə verilməsi və səsləndirilən əhatəli mesajlar göstərir ki, Azərbaycanın Naxçıvanla bağlı çox böyük planları var. Bu planlar yalnız Naxçıvanın öz inkişafı ilə məhdudlaşmır. Söhbət Naxçıvan üzərindən Şərq-Qərb bağlantısının daha da gücləndirilməsindən və muxtar respublikanın qlobal nəqliyyat-logistika sistemində mühüm qovşaqlardan birinə çevrilməsindən gedir”, – deyə X.Bəşirov bildirib.
Siyasi şərhçi vurğulayıb ki, Qars–İğdır–Naxçıvan dəmir yolu layihəsinin reallaşdırılması da bu baxımdan xüsusi əhəmiyyət daşıyır. “Azərbaycan və Türkiyə arasında nəqliyyat bağlantılarının genişləndirilməsi Naxçıvanın həm Türkiyəyə, həm də daha geniş mənada Avropa nəqliyyat sisteminə çıxış imkanlarını artıracaq. Naxçıvanın inkişafında idarəetmə mexanizmlərinin təkmilləşdirilməsi də ayrıca əhəmiyyət daşıyır. Azərbaycan Respublikası Prezidentinin Naxçıvan Muxtar Respublikasında xüsusi nümayəndəlik institutunun yaradılması, idarəetmə və kadr sahəsində həyata keçirilən islahatlar muxtar respublikanın yeni inkişaf mərhələsinin tələblərinə uyğunlaşdırılmasına xidmət edir. Azərbaycan tərəfi bu prosesdə şəffaflıq və qanunçuluq prinsiplərini əsas götürür. Bu yanaşma həm Azərbaycanın daxilində həyata keçirilən idarəetmə islahatlarında, həm də gələcəkdə Naxçıvan üzərindən keçəcək tranzit marşrutlarının fəaliyyətində özünü göstərməlidir. Zəngəzur dəhlizinin reallaşması və Orta Dəhlizin tam gücü ilə fəaliyyət göstərməsi Naxçıvanın iqtisadi modelinə də ciddi təsir göstərəcək. Uzun müddət Azərbaycanın əsas hissəsindən coğrafi baxımdan ayrı vəziyyətdə olan muxtar respublikanın gələcəkdə nəqliyyat, logistika, ticarət və investisiya baxımından daha geniş imkanlara çıxışı təmin ediləcək. Bunun üçün Naxçıvanda artıq indidən müvafiq infrastrukturun yaradılması və iqtisadi potensialın gücləndirilməsi istiqamətində mühüm addımlar atılır. Gələcəkdə həm dövlət investisiyalarının, həm də xarici sərmayələrin Naxçıvana cəlb edilməsi muxtar respublikanın iqtisadi imkanlarının daha geniş reallaşdırılmasına şərait yarada bilər”, – deyə siyasi şərhçi fikirlərini yekunlaşdırıb.
Müxbir- Səbinə Əlizadə
Bölmənin digər xəbərləri
