Son bir həftə ərzində Gürcüstanda ikinci dəfə zəlzələ qeydə alınıb
Tbilisi, 27 yanvar, AZƏRTAC
Yanvarın 27-də Gürcüstanın Mtsxeta-Mtianeti bölgəsində, Kazbek dağının 36 kilometrliyində 4,1 bal gücündə zəlzələ baş verib.
AZƏRTAC xəbər verir ki, bu barədə Gürcüstanın Milli Seysmoloji Monitorinq Mərkəzi məlumat yayıb.
Yeraltı təkanlar gecə saat 1 radələrində qeydə alınıb.
Dağıntı barədə məlumat verilmir.
Qeyd edək ki, bu, son bir həftə ərzində Gürcüstan ərazisində qeydə alınan ikinci zəlzələdir.
Birinci yeraltı təkanlar yanvarın 22-də Quriya bölgəsində 3,3 bal gücündə olmuşdu.
Məlumat üçün bildirək ki, Gürcüstan seysmoloji fəallıq baxımından orta riskli bölgə hesab olunur. Sonuncu dəfə ən güclü yeraltı təkanlar 1991-ci ildə Raça və İmereti bölgələrində 7 bal gücündə olub. Zəlzələnin episentrində isə təkanların gücü 9 bal təşkil etmişdi.
Həmin zəlzələ vaxtı 200 nəfərə yaxın insan ölüb, 46 min ev və minə yaxın sənaye obyekti dağılmışdı.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
