Son üç ildə 7 mindən çox saxta əlillik təyinatı aşkarlanaraq ləğv edilib
Bakı, 5 may, AZƏRTAC
Əsassız, saxta əlillik təyinatının aşkar edilərək ləğv olunması, əlillik təyinatlarının tam şəffaflaşdırılması sosial ədalətliliyin də vacib şərtidir və bu istiqamətdə işlər davam edəcək.
AZƏRTAC xəbər verir ki, bunu Dövlət Tibbi-Sosial Ekspertiza və Reabilitasiya Agentliyinin İdarə Heyətinin sədri Cavid Əbdül-Qədirov əlilliyin qiymətləndirilməsi və reabilitasiya sahəsində bu ilin ilk rübündə görülmüş işlərə və qarşıda duran hədəflərə dair keçirdiyi mətbuat konfransında bildirib.
O qeyd edib ki, ümumilikdə son illərdə 7 mindən çox saxta əlillik təyinatı aşkarlanaraq ləğv edilib. Nəticədə illik 30 milyon manat, aktuar hesablamalara əsasən uzunmüddətli dövr üzrə 735 milyon manatdan çox büdcə vəsaitinin qanunsuz xərclənməsinin qarşısı alınıb.
Idarə Heyətinin sədri bildirib ki, Nazirlər Kabinetinin 2015-ci il 30 dekabr tarixli qərarı ilə ölkə üzrə qüvvədə olan müddətli əlillik işləri hər hansı yoxlama olmadan, müayinələr aparılmadan avtomatik olaraq 5 il müddətinə uzadılıb. Həmin qərar 190 min şəxsi əhatə edib. Bu zaman həqiqi əlilliyi olan şəxslərlə yanaşı, artıq sağalmış və ya reabilitasiya olunmuş, habelə saxta yollarla əlillik əldə etmiş minlərlə şəxsin də əlillik müddəti uzadılıb. Hazırda əlillik müddətləri bitən şəxslərin əlilliyinin yenidən qiymətləndirilməsi işləri aparılır və bu sahədə ən vacib prinsip əlillik dərəcələrinin həqiqətən əlilliyi olanlara təyin olunması, saxta əlilliyin isə aşkar edilərək ləğv edilməsidir.
Mətbuat konfransında qeyd edilib ki, əlillik əzaların amputasiyası, sağalması mümkün olmayan ağır xəstəliklər və s. kimi geridönməz hallarda müddətsiz təyin edilir, həmin şəxslərin əlilliyi ömürlük müəyyən olunur. Ona görə də belə şəxslərin əlilliklərinin təkrar müayinəsinə ehtiyac qalmır.
C.Əbdül-Qədirov Vətən müharibəsində xəsarət almış qazilərin evlərində və ya müalicə aldıqları səhiyyə müəssisələrində ziyarət edildiklərini, əyani müayinələr şəraitində onlardan artıq 408 nəfərə müvafiq əlillik dərəcələri təyin olunduğunu və prosesin davam etdiyini bildirib. Onun dediyinə görə, həmin qazilərə əlillik təyin olunması üçün ilk növbədə onlar Müdafiə Nazirliyinin Tibb İdarəsi tərəfindən şəhadətləndirilməlidir. Şəhadətnamədə travmanın, yaralanmanın müharibə ilə səbəb əlaqəsi müəyyənləşdirilir və bu sənədə əsasən də yekun mərhələ olaraq Dövlət Tibbi-Sosial Ekspertiza və Reabilitasiya Agentliyi tərəfindən əlilliyin qiymətləndirilməsi aparılır.
Postmüharibə dövründə qazilərimizin ehtiyaclarına uyğun reabilitasiya vasitələri, sosial-psixoloji reabilitasiya xidmətləri, yüksək texnologiyalı protezlərlə təminatı və digər sahələrdə aparılan işlər barədə də məlumat verilib.
İdarə Heyətinin sədri reabilitasiya infrastrukturunun müasirləşdirilməsi işlərinin davam etdirildiyini bildirib. Bu ilin fevralında Şağan Reabilitasiya Pansionatının istifadəyə verildiyini, Qəbələ və Şəmkir şəhərlərində tikilən uşaq reabilitasiya mərkəzlərinin isə il ərzində istifadəyə veriləcəyini diqqətə çatdırıb.
Bölmənin digər xəbərləri
