ŞOYQU VERTOLYOTUN QƏZAYA UĞRAMASINDA TERROR AKTI EHTİMALINI İSTİSNA EDİR
Rusiyanın fövqəladə hallar naziri Sergey Şoyqu Krasnoyarsk diyarının cənubunda Mi-8 vertolyotunun qəzaya uğramasında terror aktı ehtimalını tamamilə istisna edir. O, bunu jurnalistlərlə söhbətində bildirmişdir.
İTAR-TASS xəbər verir ki, nazirin sözlərinə görə, vertolyotun qəzaya uğramasında əsas ehtimal onun 110 kilovolt gərginlikli elektrik xəttinə dəyməsi olmuşdur. Vertolyot yerə dəyməmişdən əvvəl heyət üzvlərinin son sözləri də bunu təsdiq edir.
Sergey Şoyqu bildirmişdir ki, “qara qutular”ın şifrinin açılması başa çatdırılmışdır. Heyət üzvlərinin sözlərindən məlum olmuşdur ki, pilotlar marşrutun yaxınlığında elektrik xətləri olduğunu bilirdilər. Lakin uçuş zamanı səmt kimi şose yolu əsas götürmüşdülər. Vertolyotun mühərrikləri də son ana qədər ahəngdar işləmişdir.
Vertolyotun qəzaya uğraması səbəblərini araşdıran komissiya Krasnoyarskda öz işini başa çatdırmışdır.
Mi-8 vertolyotu aprelin 28-də Krasnoyarsk diyarının cənubunda qəzaya uğramışdır. Vertolyotda olan 20 nəfərdən 8-i, o cümlədən Krasnoyarsk diyarının qubernatoru Aleksandr Lebed həlak olmuşdur.
Bölmənin digər xəbərləri
