“SUALTI DÖYÜŞLƏR”
Lirik şerlər və poemalar, mənzum dram əsərləri, gözəl mahnı mətnlərinin müəllifi olan tanınmış şair Yusif Həsənbəy “Şirvannəşr” nəşriyyatında yenicə çapdan çıxmış “Sualtı döyüşlər” romanı ilə oxucularla yeni görüşə bir nasir kimi gəlmişdir.
Bu əsər çoxillik zəhmətin və yaradıcılıq axtarışlarının bəhrəsidir. Xəzər Dəniz Gəmiçiliyinin “Bəstəkar Qara Qarayev”, “Rəşid Behbudov”, “Rəsul Rza”, “Mikayıl Müşfiq”, “Aşıq Ələsgər” gəmilərində dəfələrlə uzaq səfərlərə çıxan, yaradıçılıq ezamiyyətlərində olan müəllif dənizçilərimizin gərgin və maraqlı həyatından aktual oçerklər və sənədli hekayələr yazmışdır. Beləliklə, ədəbiyyatımızda mövzu etibarilə yeni bir romanın bünövrəsi qoyulmuşdur. Əsərdə təbiət qüvvələri ilə gərgin mübarizədə dənizçilərin mətinliyinin artması, dostluğunun möhkəmlənməsi canlı və inandırıcı lövhələrlə təsvir olunmuşdur. Xarici ölkə sularında, ayrı-ayrı dövlətlərin limanlarında da Vətənimizin adını, şərəfini, üçrəngli bayrağımızı uca tutan dənizçilərimizin əməyi, həyatı, rəşadəti əsərdə bədii vasitələrlə öz inikasını tapmışdır.
“Sualtı döyüşlər” romanı vətənpərvərlik ruhu, canlı, bədii obrazları ilə zəngin olan bir əsərdir.
Azərbaycan Yazıçılar Birliyinin katibi, tanınmış nasir Çingiz Abdullayev kitabın təqdimatında haqlı olaraq yazır ki, romanda təsvir olunan gərgin həyatı səhnələr əsəri həyəcanlı və oxunaqlı edir.
Bölmənin digər xəbərləri
