Südwest Presse Online: “Qafqaz ölkəsi Azərbaycan Qərbə meyllidir”
Berlin, 23 aprel (AZƏRTAC). Almaniyanın “Südwest Presse Online” elektron mətbuatında Azərbaycan “Günün mövzusu” elan edilmiş və jurnalist Vilhelm Hölkemayerin “Qafqaz ölkəsi Azərbaycan Qərbə meyllidir” sərlövhəli məqaləsi yerləşdirilmişdir.
Məqalədə deyilir ki, Azərbaycan sürətlə inkişaf edən ölkədir. Qeyd olunur ki, Azərbaycan müstəqilliyini 23 il əvvəl bərpa etmişdir. Prezident Heydər Əliyev ölkənin Qərbə inteqrasiyası siyasətini müəyyənləşdirmiş, dünyanın aparıcı neft şirkətləri ilə “Əsrin müqaviləsi”ni imzalamışdır.
Daha sonra müəllif ölkənin enerji ehtiyatlarının strateji əhəmiyyətindən söhbət açır, Bakı neftinin İkinci Dünya müharibəsində faşist Almaniyası üzərində qələbənin təmin olunmasında mühüm rol oynadığını diqqətə çatdırır. Müəllif Azərbaycanın neft gəlirlərinin ölkənin qeyri-neft sektorunun inkişafına bacarıqla yönəldildiyini yazır, bunun uğurlu nəticələrinin göz qabağında olduğunu bildirir.
Daha sonra məqalədə “ASAN xidməti” haqqında məlumat verilir. Müəllif bildirir ki, Bakıda 5 belə müasir xidmət mərkəzi yaradılmışdır və bu mərkəzdə vətəndaşlara 150 müxtəlif xidmət təklif edilir. Rüsumlar isə nağd şəkildə deyil, köçürmə ilə ödənilir. Jurnalist baş çəkdiyi “ASAN Xidmət” mərkəzində vətəndaşların böyük sayını və onlara yüksək səviyyədə xidmət göstərilməsini vurğulayır.
Azərbaycanda dini vəziyyətə toxunan müəllif bildirir ki, əhalinin 95 faizi müsəlman, amma çox az qismi qatı dindardır. Dövlət və din münasibətləri çox sağlam təməl üzərində qurulmuşdur. Hökumət məscidlərin tikintisinə və saxlanmasına dəstək göstərir. Eləcə də din xadimləri dövlət işlərinə qarışmırlar. Qeyd olunur ki, Qafqaz Müsəlmanları İdarəsinin sədri Şeyxülislam Allahşükür Paşazadə alman jurnalistlərlə söhbətində dini şəxsi məsələ adlandıraraq, zorakılıq və ekstremizmi pisləmişdir. Müəllif bildirir ki, ölkə əhalisinin 3 faizini təşkil edən xristianlar və on minlərlə yəhudi ölkədə mövcud olan dini azadlıq və tolerantlığı dövlət tərəfindən qorunan və təşviq olunan sərvət kimi yüksək qiymətləndirirlər.
Məqalənin sonunda ölkənin və regionun siyasi vəziyyətinə toxunulur. Jurnalist ölkənin daxili vəziyyətinə dair AFR-in Azərbaycandakı səfiri xanım Haydrun Tempel ilə söhbətindən “Burada heç bir vətəndaş inqilabda maraqlı deyil” sitatını gətirir və əhalinin narahatlığının qonşuları ilə bağlı olduğunu bildirir. Azərbaycan Ermənistan tərəfindən işğal olunmuş Qarabağ bölgəsinə görə münaqişə vəziyyətindədir. Münaqişə nəticəsində bir milyon insan evindən qovulmuşdur. Məqalədə xarici işlər nazirinin müavini Mahmud Məmmədquliyevin Azərbaycanın münaqişənin sülh yolu ilə həllinə tərəfdar olması, amma bu işdə Avropa İttifaqından lazımi dəstək ala bilməməsi haqqında narazılığı diqqətə çatdırılır: “Biz Avropa İttifaqını dəstəkləyir və ölkənin quruculuq işlərində Avropaya istiqamətlənirik. Bəs nəyə görə Dağlıq Qarabağ münaqişəsinin sülh yolu ilə həlli istiqamətində səylərimizdə Avropa İttifaqı bizə dəstək göstərmir?”
Məqalənin tam mətni ilə aşağıdakı linkdə tanış ola bilərsiniz:
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
