Almaniyanın müdafiə naziri: Müdafiə xərclərinin təxminən yarısı yeni texnologiyalara yönəldilib
Berlin, 9 sentyabr, AZƏRTAC
Almaniyanın müdafiə naziri Boris Pistorius ölkəsinin müdafiə sahəsində xərclərinin təxminən yarısını yeni texnologiyalara yönəltdiyini bildirib.
AZƏRTAC xəbər verir ki, nazir ARD telekanalına açıqlamasında Almaniyanın son 30 ildə milli və alyans müdafiəsinə kifayət qədər investisiya qoymadığını və nəticədə böyük boşluqların yarandığını vurğulayıb. Onun sözlərinə görə, hazırda həmin boşluqların qısa müddətdə aradan qaldırılması vacibdir. “Biz qısa müddətdə çoxlu sayda sifariş verməliyik, çünki son 30 ildə yaranmış nəhəng boşluqları aradan qaldırmalıyıq”, - deyə nazir vurğulayıb.
B.Pistorius bildirib ki, mövcud təhlükə şəraitində Almaniya sürətli hərəkət etməli və düzgün sistemləri satın almalıdır. Onun sözlərinə görə, burada əsas məsələ ənənəvi sistemlərlə yeni texnologiyalar arasında düzgün nisbətin təmin edilməsidir.
Nazir Almaniyanın müdafiə sahəsində süni intellekt və dronlara investisiya qoyduğunu, həmçinin peyk rabitəsinin təhlükəsizliyini təmin etmək məqsədilə kosmik sahəyə sərmayə yatırdığını qeyd edib. Onun sözlərinə görə, yeni texnologiyalar müdafiə xərclərinin təxminən yarısını təşkil edir, digər yarısı ənənəvi sistemlərə yönəldilir.
“Dronlar bir döyüşü qazana, onun nəticəsini müəyyən edə bilər, amma müharibəni yox. Həmişə ağır texnikaya da ehtiyac var”, - deyə Almaniyanın müdafiə naziri bildirib.
O əlavə edib ki, söhbət böyük sistemlərlə innovasiyalar, dronlarla tanklar arasında seçimdən getmir. Əsas məsələ onların düzgün kombinasiyasını yaratmaqdır.
Müdafiə naziri bildirib ki, Almaniyanın məqsədi NATO çərçivəsində çəkindirmə və tam müdafiə qabiliyyətinə nail olmaqdır.
Bölmənin digər xəbərləri
