Mərasimə toplaşanlar ulu öndər Heydər Əliyevin və Türkiyə Respublikasının banisi Mustafa Kamal Atatürkün nurlu xatirələrini bir dəqiqəlik sükutla andılar. Azərbaycanın və Türkiyənin dövlət himnləri səsləndi.

Azərbaycan Televiziyasının böyük dövlət xadiminin siyasi fəaliyyətindən bəhs edən “Əbədi zirvə” filmi nümayiş etdirildi.

Mərmərə Qrupu Strateji və Sosial Araşdırmalar Vəqfinin sədri Akkan Suver Heydər Əliyevin Vəqfin fəxri sədri olduğunu xatırlatdı, xalqlarımızın öz öndərlərini əbədiyyətə qovuşduqdan sonra da ehtiramla andığını söylədi. O, bugünkü tədbirin də türk dünyasına misilsiz töhfələr vermiş dahi şəxsiyyətin xatirəsinə böyük ehtiramın əlaməti olduğunu bildirdi.

Ölkəmizin Ankaradakı səfiri Zakir Həşimov çıxışında vurğuladı ki, 15 il öncə müstəqilliyinə yenidən qovuşan Azərbaycan dövləti və xalqı məhz Heydər Əliyevin əvəzolunmaz xidmətləri sayəsində hazırda özünün daxili və xarici siyasəti, inkişaf edən iqtisadiyyatı ilə dünyanın diqqət mərkəzindədir. Ümummilli liderimizin bizlərə miras qoyduğu ən böyük və kamil əsər Azərbaycan dövləti və türkçülükdür. “Bir millət, iki dövlət” kəlamı ilə Azərbaycan-Türkiyə əlaqələrinin tərifini vermiş ulu öndərin əsasını qoyduğu layihələr xalqlarımızın rifahına xidmət edir və hələ uzun illər bundan sonra da edəcəkdir. Günbəgün inkişaf edən, təməli müdrik siyasətçi tərəfindən qoyulan əlaqələrimizi hazırda Prezident İlham Əliyev böyük uğurla davam etdirməkdədir.

Türkiyə-Azərbaycan parlamentlərarası dostluq qrupunun sədri, millət vəkili Haluk İpək bildirdi ki, hər bir ölkənin yaşadığı tarixi proseslərin ən mühüm anında düşünülmüş dövlət siyasəti yeridildikdə, o xalqın gələcəyi daha gözəl olur. Tarix göstərmişdir ki, millətlərin bu çətin anlarında dahi dövlət adamları meydana çıxır və onlara yol göstərirlər. Heydər Əliyev də belə bir dövrdə Azərbaycanın xilaskarı olmuş, ölkənin dünyada müstəqil dövlət kimi tanınmasını, Qafqazın parlayan ulduzuna çevrilməsini təmin etmişdir. Türk dünyasının dahi şəxsiyyətinin siyasəti bu gün də Azərbaycanın tərəqqisinə yol göstərməkdədir. Bakı-Tbilisi-Ceyhan kəməri bu müdrik siyasətin bir nümunəsidir. Heydər Əliyevin bu mühüm layihənin həyata keçirilməsinə dair qərarı dövlətlərin enerji strategiyasına təsir göstərməkdə, türk və Azərbaycan xalqlarının qardaşlığını möhkəmləndirməkdədir. Heydər Əliyevin “bir millət, iki dövlət” kəlamı Azərbaycan və Türkiyə xalqlarına belə bir nəsihətdir: siz qardaşsınız, yaxşı və çətin gündə birlikdə olun, bir-birinizə dəstək olun. Sizin əlaqələriniz başqa xalqlar və dövlətlərlə münasibətlərdən daha yüksəkdə olmalıdır.

Azərbaycan Prezidentinin İcra Aparatının ictimai-siyasi şöbəsinin müdiri Əli Həsənov ulu öndərimizin xatirəsinə həsr olunmuş anım günündə iştirak etdiklərinə görə Türkiyənin sabiq Prezidenti Süleyman Dəmirələ və türk dünyasının tanınmış şəxsiyyəti, professor İhsan Doğramacıya Azərbaycan hökuməti adından minnətdarlığını bildirdi. O dedi ki, Azərbaycan xalqının fikrincə, milli liderimizin anım gününün keçiriləcəyi iki ölkədən biri məhz Türkiyə olmalıdır, çünki Heydər Əliyev hər zaman Türkiyəni Azərbaycan xalqının ikinci dövləti hesab edirdi. Bu gün onun “bir millət, iki dövlət” formulu ulu öndər Atatürkün “Azərbaycanın sevinci sevincimiz, kədəri kədərimizdir” formulu ilə birlikdə frazeoloji atalar məsəlinə çevrilərək, xalqlarımızın birliyini yönəldən düşüncə, iradə tərzinə çevrilmişdir. “Tanrı millətin liderinin taleyini yazır, millətin lideri isə öz xalqının taleyini yazır” deyən Əli Həsənov bildirdi ki, o millətlər dünyada layiqli yerini tapır və tərəqqi əldə edir ki, onların öz milli lideri olur. Bu baxımdan Azərbaycan xalqı da xoşbəxtdir. Ona görə ki, onun ən çətin vəziyyətində Heydər Əliyev kimi ulu öndər yenidən siyasət meydanına çıxdı, xalqı arxasınca apararaq, dünya xalqları sırasında öncül mövqelərə çatdırdı. Heydər Əliyev öz xalqının güclü və gözəl bir millətçisi idi. Onun millətçiliyi sərhədlərin qapanması və içimizə qapılmaq anlamı deyil, əksinə, dünyanın ən mükəmməl texnologiyalarını, nailiyyətlərini ölkəmizə gətirmək, Azərbaycanın ən yaxşı dəyərlərini dünyaya tanıtmaq məqsədi daşıyırdı. Gələcək nəsillər türk dünyasının taleyində əvəzsiz rolu olan Atatürkü, Heydər Əliyevi, Süleyman Dəmirəli və digər şəxsiyyətləri daim ürəklərində yaşadacaq və onlardan nümunə götürəcəklər.

Türk dünyasının tanınmış şəxsiyyəti, Azərbaycanın sədaqətli dostu, professor İhsan Doğramacı ulu öndərlə görüşlərindən ətraflı bəhs edərək, Atatürkün Türkiyə, Heydər Əliyevin isə Azərbaycan üçün Allahın bir lütfü olduğunu söylədi. Ümummilli liderimizlə ilk görüşünün 1992-ci il iyunun 2-də olduğunu xatırladan İhsan Doğramacı onunla hər söhbətində bu dahi şəxsiyyətin Vətən sevgisinə, öz milləti ilə qürur duyduğuna heyran qaldığını dedi. Heydər Əliyevin türk yazıçıları Namiq Kamal, Rəşad Nuri Güntəkin və digərlərinin əsərlərini uşaqlıqdan sevə-sevə oxuduğuna, onun türk dünyasına bəslədiyi məhəbbətə də heyran qaldığını bildirən cənab Doğramacı bu məhəbbətin dahi şəxsiyyətin siyasi fəaliyyətinə də təsir göstərdiyini söylədi.

Türkiyənin 9-cu Prezidenti, ulu öndərimizin dostu və qardaşı Süleyman Dəmirəl çıxışında dedi: “Bu gün burada mənim əziz dostum və qardaşım mərhum Heydər Əliyevin xatirəsi anıldı, onun haqqında çox gözəl sözlər söyləndi. Böyük dövlət və siyasət adamı, böyük insan, türk dünyasının siyasət və dövlət dahisi Heydər Əliyevin xatirəsini rəhmət və şükranla anırıq. Onu sevgi və həsrətlə arayırıq. Qəhrəmanları, böyük insanları, şəxsiyyətləri zaman meydana çıxarır. Onlar siyasi şəraitə uyğun olaraq, xalqı çətin vəziyyətdən xilas edir, ona öndərlik edirlər. Böyük dövlət adamı, əziz qardaşım Heydər Əliyev Azərbaycanda daxili çəkişmələr, vətəndaş müharibəsi təhlükəsi olan bir şəraitdə siyasi səhnəyə çıxmışdır. Onun zəngin siyasi təcrübəsi ölkəni bu ağır vəziyyətdən qurtarmağa imkan verdi”.

Azərbaycanın 163 il Rusiyanın tərkibində olduğunu xatırladan Süleyman Dəmirəl xalqımızın dilini, dinini, tarixi ənənələrini qoruyub saxladığını, ölkəmizin bir yüksək mədəniyyətin təmsilçisi olduğunu söylədi. O dedi: “Müstəqillik qazandıqdan sonra Azərbaycanın qarşısında duran əsas vəzifə bu dəfə yüksələn bayrağın enməməsi idi. Bu bayrağı kim daşısaydı, qəhrəman da o olacaqdı. Bu, Heydər Əliyevin tarixi missiyası idi. Fövqəladə çətinliklərə rəğmən böyük qəhrəmanlıq nümunəsi göstərən dahi şəxsiyyət, o bayrağı əbədi yüksəklərdə tutdu, Azərbaycanı dünyaya bir türk dövləti kimi tanıtdı. Mən bütün bu çətinliklərin içində olduğum üçün, indi də onları düşündükcə tərləyirəm. Mən Heydər Əliyev Naxçıvanda ikən ondan Azərbaycana niyə gəldiyini soruşdum. O dedi: “Mən doğulduğum yerdə xalqıma xidmət etmək istədim, başqa yerdə bunu edə bilməzdim. Cünki mən bir türkəm. Bunu söylədikdən sonra mən onu daha çox sevdim. Heydər Əliyev mənim gördüyüm dövlət adamları arasında Atatürkü ən çox sevən bir insan idi. O deyirdi ki, Azərbaycan mənim nəfəsimdir. Bu sözləri deyən insanı kim sevməz? Heydər Əliyev Vətən atəşinin istisi ilə yaşayırdı. Azərbaycan öz diyarım, babalarımın və övladlarımım yuvası, ilk sevgim və son mənzilimdir. Torpağından var oldum, torpağına qarışacağım deyirdi. İndi o, Azərbaycandakı möhtəşəm qəbiristanlıqda Xəzər dənizinin bəzən gur, bəzən də sakit dalğalarına baxaraq uyuyur. Heydər Əliyev “Vətən mənim şöhrətim, şanım, sevincim, qürurum, əzəmətimdir” deyərdi. Azərbaycanı belə sevən bir insanı Azərbaycan da əbədiyyətə qədər sevəcəkdir”.

Mərasimdə çıxış edən Milli Məclisin deputatları Zeynəb Xanlarova, Fəttah Heydərov və Abel Məhərrəmov da ulu öndərimizin xilaskarlıq missiyasını cəsarətlə yerinə yetirməsindən, onun həyat və fəaliyyətindən bəhs etdilər.

Anım günündə Türkiyənin müxtəlif şəhərlərindən gəlmiş Azərbaycan dərnəklərinin rəhbərləri, millət vəkilləri, ictimaiyyətin nümayəndələri iştirak edirdilər.