SUMQAYITDA MÜƏLLİMLƏRİN ƏNƏNƏVİ AVQUST KONFRANSI
Kimyaçıların Ü.Hacıbəyov adına mədəniyyət evində Sumqayıt müəllimlərinin ənənəvi avqust konfransı keçirilmişdir.
Şəhər İcra Hakimiyyəti başçısının müavini Ramiz Həsənov məruzəsində bildirdi ki, ötən dərs ili şagirdlər və müəllimlər üçün uğurlu olmuşdur. 85 min məktəblinin 7 min nəfərindən çoxu dərs ilini əla qiymətlərlə başa vurmuşdur. Bir sıra müəllimlərin adları respublikada ən yaxşılar sırasında çəkilmiş, bir çoxları Təhsil Nazirliyi nəzdindəki dərslik hazırlığı üzrə elmi şuraya cəlb edilmişlər.
Konfransda çıxış edənlər hami təşkilatların işini yüksək qiymətləndirərək vurğuladılar ki, bunun sayəsində şəhərdəki 48 orta məktəbin hamısı təmir olunmuşdur və yeni dərs ilinə hazirdır. Şəhər bələdiyyəsi ilə xalq təhsili şöbəsi arasındakı sıx əlaqələr tədris prosesinə müsbət təsir göstərir. Sumqayıtlı 20 ən yaxşı tələbə onların təqaüdçüsü olmuşdur.
Konfransda 600-dən çox bal toplamış abituriyentlərə, habelə məktəblilərin ümumdünya olimpiyadasında 3 qızıl və 1 bürünc medala layiq görülmüş şagirdlərə qiymətli hədiyyələr təqdim olundu.
Mədəniyyət sarayının foyesində uşaqların əl işləri, habelə müəllimlərin çap olunmuş əsərləri və şəhər xalq təhsili şöbəsinin buraxdığı “Sabah” qəzetinin dəsti nümayiş etdirilirdi.
Konfransda təhsil nazirinin müavini İradə Hüseynova iştirak edirdi.
Bölmənin digər xəbərləri
