Şuşanın bərpası istiqamətində həyata keçirilən bir sıra layihələr bu il başa çatdırılacaq
Şuşa, 25 may, AZƏRTAC
Şuşa şəhərinin bərpa olunması istiqamətində işlər sürətlə davam edir və cari ildə bir sıra layihələr başa çatdırılacaq.
AZƏRTAC xəbər verir ki, bu sözləri İdarələrarası Mərkəzin “Enerji təminatı məsələləri” üzrə İşçi Qrupunun növbəti iclasında çıxış edən Prezidentin Şuşa şəhərində xüsusi nümayəndəliyinin baş məsləhətçisi Kənan Quliyev deyib.
O bildirib ki, işğaldan azad olunan ərazilərə Böyük Qayıdış proqramına uyğun olaraq Şuşada 23 binanın tikintisinə başlanılıb və buraya 1500 nəfərin köçürülməsi nəzərdə tutulub.
Məktəb, xəstəxana və poçt binalarının tikintisi davam edir. Bu tikintilər xüsusi arxitektura ilə inşa olunur. Poçtun inzibati binasında DOST və “ASAN xidmət” mərkəzləri də fəaliyyət göstərəcək.
“Enerji təminatı üçün 5 yarımstansiya tikilib istifadəyə verilib. Daşaltı çayı üzərində isə su anbarı və nasos stansiyası da istifadəyə verilib. Şuşanın kanalizasiya sisteminin tikintisi davam edir”, - deyə o əlavə edib
Bölmənin digər xəbərləri
