Tailandda hərbi qulluqçu odlu silahla ən azı 12 nəfəri qətlə yetirib
Pekin, 8 fevral, AZƏRTAC
Tailandın şimal-şərqindəki Nakhonratçasima vilayətində hərbi hissədə qulluq edən əsgər odlu silahla ən azı 12 nəfəri qətlə yetirib.
AZƏRTAC yerli KİV-lərə istinadla xəbər verir ki, əsgər hərbi hissədən oğurladığı silahla əvvəlcə tabe olduğu zabitlərdən birini və 2 əsgər yoldaşını güllələyib. Daha sonra şəhərdəki ticarət mərkəzlərindən birində qarşısına çıxanlara atəş açıb. Əsgər hücumu zamanı mobil telefonla selfi foto və videolar çəkərək, sosial şəbəkədə paylaşıb, habelə "Facebook"da canlı videolar yayıb. Bildirilir ki, hazırda ticarət mərkəzində olan hərbçinin tutulması üçün əməliyyat aparılır. Onun bir neçə nəfəri girov götürdüyü də güman olunur. İki kilometr radiusda ərazi mühasirəyə alınıb. Polisin məlumatına əsasən xeyli sayda yaralı var.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
