MƏDƏNİYYƏT
Tanınmış aktyorla görüş keçirilmişdir
Bakı, 30 oktyabr (AZƏRTAC). Oktyabrın 30-da Mərdəkan Mədəniyyət Sarayında Bakı Şəhər Mədəniyyət və Turizm İdarəsinin təşkilatçılığı ilə tanınmış aktyor, Əməkdar Artist Vidadi Həsənov ilə görüş keçirilmişdir.
AZƏRTAC xəbər verir ki, aktyorun həmkarlarının, teatrşünasların və ictimaiyyət nümayəndələrinin iştirak etdikləri tədbirdə onun sənət və həyat yolundan söhbət açılmışdır.
Bildirilmişdir ki, Vidadi Həsənov 1979-cu ildən Cəfər Cabbarlı adına Gəncə Dövlət Dram Teatrında fəaliyyətə başlamışdır. 1980-ci ildə isə dram və kino aktyoru ixtisası üzrə Azərbaycan Dövlət Mədəniyyət və İncəsənət İnstitutuna qəbul olunmuş, eyni zamanda, institutun tədris teatrında aktyor kimi fəaliyyətini davam etdirmişdir.
Diqqətə çatdırılmışdır ki, V.Həsənov “Bəyin oğurlanması”, “Yalan”, “Hökmdarın taleyi” və bir çox filmlərdə yaddaqalan obrazlar yaratmışdır.
Hazırda Azərbaycan Dövlət Mədəniyyət və İncəsənət Universitetinin estrada rejissoru kafedrasının dosenti olan Vidadi Həsənovun vaxtilə çəkildiyi filmlərdən fraqmentlər nümayiş etdirilmişdir.
Sonda aktyor gənclərin suallarını cavablandırmış, onlarla xatirə şəkli çəkdirmişdir.