Taninmiş kardioloq Ronald Hettser Bakıya gəlmişdir
Bakı, 21 dekabr (AZƏRTAC). Bakıda, Azərbaycan Dövlət Tibb Universitetinin (ADMU) Tədris-Cərrahiyyə Klinikasında dünya şöhrətli alman kardioloqu, Berlində Ürək-Damar və Torakal Cərrahiyyə Klinikasının Alman Kardiologiya Mərkəzinin (AKM) direktoru, professor Ronald Hettserlə görüş keçirilmişdir. Əvvəlcə ADMU-nun rektoru, akademik Əhliman Əmiraslanov fəxri qonağı ADMU-nun Təlim-Cərrahiyyə Klinikası ilə tanış edərək bildirmişdir ki, burada cərrahiyyə və diaqnostika istiqamətli 18 kafedra, 20 bölmə fəaliyyət göstərir. Klinikanın tibb avadanlığını yüksək qiymətləndirən R.Hettser onun dünya standartlarına cavab verdiyini bildirmişdir.
AZƏRTAC xəbər verir ki, AKM dünyanın aparıcı kardiocərrahiyyə klinikalarından biridir, Ronald Hettser isə ürəyin transplantasiyası üzrə ümumalmaniya proqramının işlənib hazırlanmasında yaxından iştirak etmişdir. R.Hetser 1983-cü ilin iyulunda Hannoverdə ilk dəfə ürəyin transplantasiyası əməliyyatını həyata keçirmişdir. 1986-cı ildən AKM-ni yaratmağa başlayır. 1988-ci ildən başlayaraq mərkəzdə R.Hettserin rəhbərliyi altında ürəyə operativ müdaxilə edilir, o cümlədən ürəyin transplantasiyası əməliyyatları aparılır. Artıq təqribən 1000 belə əməliyyatın həyata keçirildiyi Kardiologiya Mərkəzi bu sahədə Almaniyada birinci, dünyada isə 4-5-ci yerdədir.
ADTU-nun rektoru R.Hettserə “Azərbaycan Dövlət Tibb Universitetinin fəxri qonağı” diplomunu təqdim etmişdir.
AKM-nin direktoru mərkəz barədə ətraflı məlumat verərək bildirmişdir ki, burada ürək-damar və torakal cərrahiyyə, daxili xəstəliklər (kardiologiya), uşaq kardiologiyası və anadangəlmə ürək qüsuru bölmələri və anesteziologiya institutu fəaliyyət göstərir. Hər il mərkəzdə ürək üzərində təqribən 3500 açıq əməliyyat və 1500-dən çox başqa əməliyyat, ürəyə kateter qoyulması üzrə təqribən 500 əməliyyat, anadangəlmə ürək qüsurlu xəstələrdə kateterdən istifadə etməklə 500-dən çox əməliyyat və 800 müayinə aparılmış, o cümlədən 400 kateter müdaxiləsi olmuşdur. Mərkəzdə ürək köçürülməsi üzrə 1600 (o cümlədən uşaq üzərində 160), ürəyin və ağ ciyərin kompleks köçürülməsi üzrə 480 əməliyyat aparılmışdır. Süni ürək implantasiyası, istər uşaqlarda, istərsə də ahıllarda mürəkkəb anadangəlmə ürək qüsurlarının cərrahiyyəsi bu sahədə dünyada aparıcı yerlərdən birini tutan klinikanın əsas elmi istiqamətlərindən biridir. Klinikanın nəzdində Aorta Xəstəlikləri Mərkəzi, o cümlədən Marfan Sindromu Mərkəzi fəaliyyət göstərir. Mərkəzdə uşaqlar və yaşlılar üzərində hibrid əməliyyatlar aparılır, ürək klapanları, aorta xəstəliklərinin cərrahi yolla müalicəsi aparılır.
Daha sonra tanınmış kardioloq azərbaycanlı həmkarların suallarına cavab vermişdir. Qeyd edək ki, R.Hettser başçılıq etdiyi mərkəzdə hər il beş azərbaycanlı kardioloqun staj keçməsinə razılıq vermişdir.
Bölmənin digər xəbərləri
