Tbilisidə “Gələcəyə aparan yol” adlı sərgi açılıb
Tbilisi, 10 may, AZƏRTAC
Mayın 10-da Tbilisidə Gürcüstanın Təsviri İncəsənət Muzeyində xalqımızın ümummilli lideri Heydər Əliyevin anadan olmasının 99-cu ildönümünə həsr olunmuş “Gələcəyə aparan yol” adlı fotosərgi açılıb.
AZƏRTAC xəbər verir ki, sərgi Azərbaycanın Gürcüstandakı səfirliyinin təşəbbüsü, Gürcüstan Təsviri İncəsənət Muzeyi və M.F.Axundzadə adına Azərbaycan Mədəniyyəti Muzeyinin birgə təşkilatçılığı ilə reallaşıb.
Sərgidə ümummilli lider Heydər Əliyevin Gürcüstana, eləcə də Eduard Şevardnadzenin Azərbaycana səfərlərinə, beynəlxalq tədbirlərdə, enerji layihələrinin təməlqoyma və açılış mərasimlərində iştirakına dair 50-yə yaxın foto nümayiş etdirilir.
Bundan başqa, sərgidə Eduard Şevardnadze Fondunda saxlanılan və ulu öndər Heydər Əliyev tərəfindən gürcü liderinə hədiyyə olunan şəxsi əşyalar da sərgilənir. Bu əşyalar E.Şevardnadzenin ailə üzvləri tərəfindən təqdim olunub.
Qeyd edək ki, sərgidə AZƏRTAC-ın fotoarxivindən alınmış 30-a yaxın nadir foto da var.
Sərginin açılış mərasimində Gürcüstanın sabiq prezidenti Eduard Şevardnadzenin nəvəsi Sofiko Şevardnadze Azərbaycan ilə Gürcüstan arasındakı dostluq əlaqələrindən danışıb. Tbilisidə babasının yaxın dostu Heydər Əliyevin xatirəsinə həsr olunan sərginin açılışını ölkələrimiz arasındakı münasibətlərin bariz nümunəsi adlandırıb.
Azərbaycanın Gürcüstandakı səfiri Faiq Quliyev çıxışında ölkələrimiz arasındakı əlaqələrin inkişaf perspektivləri barədə məlumat verib. Ölkələrimiz arasında əlaqələrin inkişafında və bugünkü strateji tərəfdaşlıq səviyyəsinə yüksəlməsində Azərbaycan xalqının ümummilli lideri Heydər Əliyevin və Gürcüstanın sabiq prezidenti Eduard Şeverdnadzenin xidmətlərini xüsusi qeyd edib.
O bildirib ki, sərgidə nümayiş olunan fotoşəkillər Azərbaycanın və Gürcüstanın müstəqilliyinin ilk illərini xatırladır. 1991-ci ildə Azərbaycan ilə Gürcüstan müstəqilliyini bərpa etdikdən sonra hər iki dövlət çox ciddi problemlərlə üzləşmişdi. Hər iki dövlətin müstəqilliyinin itirilməsi təhlükəsi yaranmışdı. Lakin həmin çətin günlərdə xalq böyük siyasi liderlərə üz tutub onların siyasi hakimiyyətə qayıtmasını tələb etdi. Heydər Əliyev və Eduard Şeverdnadzenin qətiyyəti və zəngin dövlətçilik təcrübəsi nəticəsində hər iki xalq qüdrətli dövlət qurdu və müstəqilliyini qoruyub saxlaya bildi.
Diplomat deyib ki, dövlət müstəqilliyimizin bərpasından sonra Azərbaycan və Gürcüstan arasında əlaqələr yeni müstəvidə inkişaf etməyə başladı. 1996-cı ildə ümummilli lider Heydər Əliyevin Gürcüstana səfəri zamanı strateji tərəfdaşlığımızın əsası qoyuldu. Həmin səfər zamanı imzalanmış sənədlər ikitərəfli strateji tərəfdaşlığın hüquqi bazasını yaradıb.
F.Quliyev Prezident İlham Əliyevin 2015-ci ildə Gürcüstana səfəri zamanı E.Şevardnadzenin evini ziyarət etdiyini, ailə üzvləri ilə görüşünü xatırladıb. Bildirib ki, bu cür səfərlər, imzalanan çoxsaylı sənədlər bizim xalqlarımızın sülh, əmin-amanlıq şəraitində və firavan yaşamaları üçün möhkəm zəmin yaradıb.
Səfir sərginin təşkilində əməyi keçən hər kəsə, o cümlədən AZƏRTAC-a təşəkkür edib.
Daha sonra çıxış edən Gürcüstan xarici işlər nazirinin müavini Aleksander Xvtisiaşvili deyib ki, Azərbaycan ilə Gürcüstan arasında əlaqələrin qədim tarixi var. Bizə keçmişdən miras qalan bu dostluğun möhkəmləndirilməsi və inkişafında, regional və qlobal əhəmiyyətli iqtisadi layihələrin həyata keçirilməsində Heydər Əliyevin müstəsna xidmətləri var.
Heydər Əliyevi Gürcüstanın böyük dostu adlandıran Xvitisiaşvili deyib: “Heydər Əliyev gürcü və Azərbaycan xalqları arasında əsrlərə söykənən münasibətləri inkişaf etdirib, daha da möhkəmləndirdi”.
Gürcüstanın sabiq dövlət naziri və Prezident Administrasiyasının rəhbəri Vaja Lortkipanidze çıxış edərək ümummilli lider Heydər Əliyev bərədə fikirlərini bölüşüb, iki liderin şəxsi səyləri nəticəsində ölkələrimizin inkişaf perspektivləri barədə danışıb
Daha sonra ulu öndər Heydər Əliyev və Eduard Şeverdnadzenin həyat və fəaliyyətindən bəhs edən sənədli film nümayiş etdirilib, tədbir iştirakçıları sərgidə nümayiş olunan fotolara baxıblar.
Sərginin açılış mərasiminə Azərbaycanın Batumidəki baş konsulu Pərviz İsmayılzadə, SOCAR-ın Gürcüstan nümayəndəliyinin rəhbəri Mahir Məmmədov, AZEBİ-nin idarə heyətinin sədri Nəriman Qurbanov, Gürcüstan Xarici İşlər Nazirliyinin, parlamentinin, meriyasının rəsmi şəxsləri, Tbilisidəki diplomatik korpusun rəhbərləri və əməkdaşları, azərbaycanlı iş adamları, ziyalılar qatılıblar.
Sərgi mayın 15-dək davam edəcək.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
