TBİLİSİDƏ MDB ÖLKƏLƏRİ BAŞ PROKURORLARININ İCLASI KEÇİRİLƏCƏKDİR
AZƏRTAC-ın xüsusi müxbiri xəbər verir ki, iyulun 17-də MDB ölkələri Baş prokurorları əlaqələndirmə şurasının iclası keçiriləcəkdir.
İclasda 10 ölkədən nümayəndə heyəti iştirak edəcəkdir. Burada insan oğurluğuna qarşı birgə mübarizə tədbirləri, insan, insan orqanları və hüceyrələri ilə alver, qanunsuz mühacirət əleyhinə mübarizə məsələləri, cinayətkarlıqla mübarizə üzrə hərəkət planı müzakirə olunacaqdır. Prokurorlar terrorizm və ekstremizmin digər təzahürlərinə qarşı mübarizənin nəticələrinə yekun vuracaq, narkotik, psixotrop maddələrin qanunsuz dövriyyəsi əleyhinə mübarizə proqramına qiymət verəcək, birgə hərəkət planı işləyib hazırlayacaqlar. Bu sahələrdə əməkdaşlıq haqqında birgə sənədlərin qəbul olunması planlaşdırılmışdır.
Baş prokurorların daimi fəaliyyət göstərən orqanının iclası ildə iki dəfə keçirilir. Gürcüstanda həmin iclas ilk dəfə 1997-ci ildə keçirilmişdir.
Bölmənin digər xəbərləri
