Təkrar emal olunmuş polietilendən hazırlanmış təkər istehsal edilib
Bakı, 25 aprel, AZƏRTAC
Almaniyanın “Continental” şirkəti təkrar emal edilmiş polietilen tereftalatadan (PET) istifadə etməklə minik avtomobilləri üçün təkərlərin kütləvi istehsalını həyata keçirəcəyini bildirib.
Şirkət təkərlərin istehsalında təkrar emal edilmiş plastik PET butulkalardan əldə edilən poliester sapdan istifadə etməyə imkan verən yeni “ContiRe.Tex” texnologiyasını işləyib hazırlayıb. Şirkətdən verilən məlumata görə, standart təkər dəsti 40-a yaxın təkrar emal edilmiş PET butulkadan hazırlanır.
AZƏRTAC Ekologiya və Təbii Sərvətlər Nazirliyinin rəsmi feysbuk səhifəsinə istinadla bildirir ki, yüksək performanslı material ilk dəfə “Continental ContiPremiumContact 6” və “Continental ContiEcoContact 6” yay təkərlərinin bəzi ölçülərində istifadə olunur. Təkrar emal üçün yığılmış PET butulkalar əvvəlcə çeşidlənir, mexaniki təmizlənir, əzilir, daha sonra hissəciklərə bölünür və nəhayət poliester sapa çevrilir.
Bölmənin digər xəbərləri
