“TƏLƏBƏLƏRƏ DƏSTƏK XİDMƏTLƏR SİSTEMİ” MÖVZUSUNDA SİMPOZİUM
Xəzər Universitetində Böyük Britaniyanın Middlesex Universiteti və İtaliyanın Sannio Universiteti ilə birgə “Tələbələrə dəstək xidmətlər sistemi” mövzusunda ikigünlük simpozium keçirilmişdir. Respublikamızın ayrı-ayrı ali məktəblərinin və xarici təşkilatların nümayəndələrinin iştirak etdiyi tədbir Avropa Birliyinin tələbələrə dəstək xidmətlər mərkəzinin yaradılması sahəsində Xəzər Universitetinə yardım göstərmək üzrə ikiillik (2001-2003) layihəsinin yekunlarına həsr olunmuşdur. Bu layihə çərçivəsində Xəzər Universitetində “Tələbələrə dəstək xidmətlər” mərkəzi yaradılmışdır.Universitetin rektoru, professor Hamlet İsaxanlı və Middlesex Universitetinin professoru Dennis Hardy iştirakçılara layihə barədə ətraflı məlumat vermişlər. Təhsil nazirinin müavini Elmar Qasımov ölkəmizdə həyata keçirilən təhsil islahatının uğurlu nəticələrindən, ali məktəblərimizin beynəlxalq əlaqələrindən danışmışdır. Müxtəlif mövzularda dinlənilən maraqlı məruzələrdə “Tələbələrə dəstək xidmətlər” mərkəzinin məqsəd və mahiyyətindən, bu təcrübənin digər ali məktəblərdə yayılmasından və sair məsələlərdən bəhs edilmişdir. Sonda mövzu ilə bağlı geniş fikir mübadiləsi aparılmışdır.
Bölmənin digər xəbərləri
