Tikinti layihələrinin ekoloji cəhətdən qiymətləndirilməsi və rəyin verilməsi məqsədilə ictimai dinləmə keçiriləcək
Bakı, 10 sentyabr, AZƏRTAC
Dövlət Ekoloji Ekspertiza Agentliyinə daxil olan sosial-infrastruktur və abadlıq işləri ilə bağlı tikinti layihələrinin ekoloji cəhətdən qiymətləndirilməsi və müvafiq rəyin verilməsi məqsədilə sentyabrın 17-də onlayn ictimai dinləmə keçiriləcək.
Ekologiya və Təbii Sərvətlər Nazirliyinin mətbuat katibi İradə İbrahimova AZƏRTAC-a bildirib ki, layihə icraçıları, ictimaiyyət və QHT nümayəndələri, aidiyyəti ekspert-mütəxəssislərin iştirakı ilə keçiriləcək ictimai dinləmədə agentliyə təqdim olunan hər bir layihənin ətraf mühitə təsiri, kompensasiya mexanizmləri müzakirə olunacaq, əhali üçün maraq kəsb edən məsələlərə diqqət yetiriləcək, yekun rəyin qəbul edilməsi üçün maraqlı tərəflərin fikirləri dinləniləcək.
Nazirliyin mətbuat katibinin sözlərinə görə, 2019-cu ildən başlayaraq agentliyə təqdim olunan və əhali üçün xüsusi maraq kəsb edən mühüm ekoloji layihələrə şəffaflığın təmin olunması və ictimaiyyətin məlumatlandırılması məqsədilə ictimai dinləmələrdən, maraqlı tərəflərlə müzakirələrdən sonra rəy verilir.
İctimai dinləmədə iştirak etmək istəyənlər sentyabrın 17-də saat 15:00-da aşağıdakı linkə daxil olaraq müzakirələrə qoşula bilərlər: https://us05web.zoom.us/j/89798782477?pwd=bWUvN3hDZUJWeG00TWhyaGdheUtndz09
Bölmənin digər xəbərləri
