Tofiq Musayev: Rəqibin kimliyi önəmli deyil, özümə güvənirəm
Bakı, 19 oktyabr, AZƏRTAC
“Turnirin startına çox az vaxt qalıb. Demək olar ki, ağır məşqlərimiz yekunlaşıb. Təmkinli olmalı və yaxşı döyüş nümayiş etdirməliyik”.
AZƏRTAC xəbər verir ki, bu sözləri Azərbaycanın MMA döyüşçüsü Tofiq Musayev "Qəbələ" İdman Klubu ilə yeni müqavilənin imzalanma mərasimində Bakıda “Rizin” çərçivəsində keçiriləcək “Landmark 7” turniri ilə bağlı danışarkən deyib.
34 yaşlı idmançı bildirib ki, yarışda ölkəni layiqincə təmsil etmək üçün əlindən gələni edəcək: “Çünki Vətənimizdə vuruşacağıq. Məsuliyyət böyükdür. Rəqibim Toji Takeda yüksək potensiala malikdir. Maraqlı döyüş olacağını düşünürəm”.
O, əvvəlcə braziliyalı döyüşçü ilə vuruşmaq istədiyini, amma idmançının aldığı zədə səbəbindən bunun reallaşmadığını vurğulayıb: “Buna görə də mənə yaponiyalı Toji Takeda ilə döyüşməyi təklif etdilər. Rəqibin kimliyi mənim üçün önəmli deyil. Kiminlə döyüşməyimin heç bir fərqi yoxdur. Hər iki halda özümə güvənim tamdır”.
Qeyd edək ki, “Landmark 7” turniri noyabrın 4-də Milli Gimnastika Arenasında keçiriləcək.
Bölmənin digər xəbərləri
