TONİ BLEYER İSRAİL-FƏLƏSTİN MÜNAQİŞƏSİNİN NİZAMA SALINMASI BARƏDƏ
Böyük Britaniyanın baş naziri Toni Bleyer İsrail-Fələstin münaqişəsinin nizama salınmasına və ABŞ-ın və ərəb dövlətlərinin köməyi ilə Yaxın Şərqdə sülh prosesinin bərpa olunmasına çağırmışdır. Baş nazir yerli kütləvi informasiya vasitələrinə verdiyi müsahibədə vurğulamışdır ki, “Avropa Birliyi münaqişənin dinc, siyasi yolla nizama salınmasında iştirak etməlidir, lakin biz Birləşmiş Ştatlar və ərəb ölkələri ilə birgə fəaliyyət göstərməliyik”.
Toni Bleyer demişdir: “Cenində baş verən hadisələr dəhşətli və faciəlidir. Eyni sözləri restoranlarda olarkən, hətta dini ayinləri icra edərkən terrorçuluq aktlarının qurbanı olmuş çoxsaylı günahsız israillilər barədə də demək olar”.
İTAR-TASS-ın verdiyi xəbərə görə, leyboristlər hökumətinin başçısı dünya liderlərini seyrçi mövqe tutmamağa və sülh prosesinin bərpasına səy göstərməyə çağırmışdır. Baş nazir demişdir: “Yaxın Şərqdə qan tökülməsini siyasi tədbirlər görmədən və zorakılığın qarşısını almadan dayandırmaq mümkün deyil, lakin bunun üçün sülh prosesi lazımdır”.
Bölmənin digər xəbərləri
