TURİST MÜBADİLƏSİNİN GENİŞLƏNDİRİLMƏSİ MƏSƏLƏLƏRİ MÜZAKİRƏ OLUNMUŞDUR
Sentyabrın 3-də gənclər, idman və turizm naziri Əbülfəz Qarayev və İslam Aləmi Liqasının baş katibi doktor Abdulla bin Əbdülmühsin Ət-Türkinin görüşündə Səudiyyə Ərəbistanı ilə Azərbaycan arasında turist mübadiləsinin genişləndirilməsi məsələləri müzakirə olunmuşdur.
Azərbaycandan hər il Səudiyyə Ərəbistanına xeyli zəvvarın ziyarətə getdiyini bildirən nazir, bu ölkədən Azərbaycana turistlər cəlb etmək, habelə respublikamızda turizmin inkişafına sərmayə qoyulması məqsədi ilə ölkələrimizin turizm təşkilatları arasında əməkdaşlıq yaradılmasını təklif etmişdir. Əbülfəz Qarayev qonağa sərmayədarlar üçün proqram, Azərbaycan təbiəti haqqında müxtəlif bukletlər təqdim etmişdir.
Nazir Ermənistan-Azərbaycan, Dağlıq Qarabağ münaqişəsi barədə də məlumat verərək, islam təşkilatlarının Azərbaycanın mövqeyini dəstəklədiyini vurğulamışdır.
Doktor Ət-Türki Azərbaycan nazirini Səudiyyə Ərəbistanına dəvət etmişdir.
Bölmənin digər xəbərləri
