Türkiyə Böyük Millət Məclisinin sədri dünya ölkələrinə Xocalı soyqırımı ilə bağlı müraciət etmişdir
Bakı, 25 fevral (AZƏRTAC). Türkiyə Böyük Millət Məclisinin (TBMM) sədri Cəmil Çiçək dünya ölkələrinə Xocalı soyqırımı ilə bağlı müraciət etmişdir.
AZƏRTAC Türkiyə mətbuatına istinadla xəbər verir ki, C.Çiçək 1992-ci il fevralın 25-dən 26-na keçən gecə Xocalıda baş vermiş hadisələri XX əsrin ən böyük soyqırımılarından biri adlandırmış, bu faciənin Ermənistan tərəfindən işğal edilmiş Dağlıq Qarabağda törədildiyini xatırlatmışdır. Sədr Azərbaycan torpaqlarının 20 faizini işğal altında saxlayan Ermənistanın bir milyondan artıq azərbaycanlını doğma yurd-yuvalarından didərgin saldığını da diqqətə çatdırmışdır.
“Bu soyqırımı bəşəriyyət tarixində böyük bir ləkədir”, - deyən C.Çiçək qeyd etmişdir ki, faciənin səbəbkarları Beynəlxalq Ədalət Məhkəməsi qarşısında cavab verməlidirlər.
TBMM-in sədri Cənubi Qafqazda daimi sülhün və əmin-amanlığın bərqərar edilməsi üçün Ermənistanın işğal altında saxladığı Azərbaycan torpaqlarından geri çəkilməsinin zəruriliyini vurğulamışdır.
Bölmənin digər xəbərləri
