Türkiyədə axtarışda olan beş minədək cinayətkar saxlanılıb
İstanbul, 13 may, Günel Karatepe, AZƏRTAC
Son beş gün ərzində Türkiyədə müxtəlif cinayətlərdən axtarışda olan 4995 nəfər saxlanılıb.
AZƏRTAC xəbər verir ki, bu barədə Türkiyənin daxili işlər naziri Ali Yerlikaya açıqlamasında bildirib.
Məlumata əsasən, ölkənin 81 vilayətində “Çəmbər-18” kod adı altında keçirilən əməliyyatda Türkiyənin təhlükəsizlik qüvvələrinin müxtəlif qurumlarının əməkdaşları iştirak ediblər. Oğurluq, dələduzluq, talama, qəsdən adamöldürmə, narkotik maddələrin satışı və istifadəsi, terror qruplaşmaları ilə əlaqə, qaçaqmalçılıq kimi bir çox cinayət maddələri ilə axtarışda olan bu şəxslər arasında beş və on il qəti həbs cəzasına məhkum edilənlər də var.
Onlar müvafiq tədbirlərdən sonra aidiyyəti məhkəmələrə yönləndiriliblər.
Bölmənin digər xəbərləri
