TÜRKİYƏDƏ YAĞIŞIN GƏTİRDİYİ FƏLAKƏT
Son üç gündə aramsız yağan yağış Türkiyənin şimali-şərqində böyük fəlakətə səbəb olmuşdur. Yozqat, Çorum, Kayseri, Samsun, Rizə vilayətlərində bir həftə içində 28 adam həlak olmuş, 20 nəfər itkin düşmüş, onlarca vətəndaş yaralanmışdır. İyulun 24-də, təkcə bir gündə Rizə vilayətinin Çayeli və Güneysu rayonlarında 13 nəfər həlak olmuşdur. Rizə valisi Bülənd Karaçölün dediyinə görə, vilayətin 95 kəndi ilə əlaqə yaratmaq mümkün deyildir. Kəndlərə gedən bütün yollar dağılıb, su altında qalmışdır. Bölgənin telefon rabitəsi sıradan çıxmışdır. İçməli su qıtlığı var.ı Elektrik enerjisi və qaz təchizatı kəsilmişdir. Rizə vilayətindəki beş çay emalı fabrikində iş dayanmışdır. Yolların dağılması bölgəyə lazımi texnikanın və yardımın çatdırılmasını ləngidir.
Təbii fəlakətlə əlaqədar Türkiyənin daxili işlər naziri Rüşdü Kazım Yücələnin rəhbərliyi altında dövlət komissiyası yaradılmışdır. Türkiyə baş nazirinin müavini, dövlət naziri Məsud Yılmaz fəlakət bölgəsinə gedərək, vəziyyətlə və bərpa işləri ilə tanış olmuşdur. Dövlət təbii fəlakətin nəticələrinin aradan qaldırılması üçün xüsusi vəsait ayırmışdır.
Tural Rzayev
AZƏRTAC-ın xüsusi müxbiri
Ankara
Bölmənin digər xəbərləri
