Ankara, 31 dekabr, AZƏRTAC

“Bəşər Əsəd rejiminin süqutundan sonra Suriya erməniləri arasından olan terrorçular Suriyanın yeni hakimiyyət orqanlarına qarşı təxribat fəaliyyətinə başlayıblar”.

AZƏRTAC xəbər verir ki, bu fikri Ankara Avrasiya Araşdırmaları Mərkəzinin (AVİM) analitiki Tuğçe Tecimer bildirib.

Onun sözlərinə görə, Bəşər Əsəd rejiminin Ermənistan hakimiyyəti ilə sıx əlaqələri vaxtilə Suriya ərazisində fəaliyyət göstərən terror təşkilatlarına birbaşa təsir edib. 2019-cu il aprelin 24-də Suriyada PKK terror təşkilatının Suriya qanadı - YPG-nin komandanlığı altında fəaliyyət göstərən “Nubar Ozanyan Briqadası”nın yaradılması bunun bariz nümunəsidir.

“Nubar Ozanyan Briqadası”nın başçıları məqsədlərinin “Suriya ermənilərinin müdafiəsi” və “Türkiyədən müdafiə” olduğunu bəyan ediblər. Bu strukturun onlarla terrorçusu son illər Suriyanın Həsəkə, Rəsulayn və Amud bölgələrində fəaliyyət göstərir”, - AVİM analitiki qeyd edib.

Türkiyəli ekspert bildirib ki, “Nubar Ozanyan Briqadaları” Əsəd rejimi tərəfindən heç bir müqavimətlə üzləşməyib, Suriyada hakimiyyət dəyişikliyi fonunda isə ölkədə sabitliyin pozulmasına dair addımlar atmağa başlayıb.

O, qeyd edib ki, müəyyən məlumatlara görə, həmin “Briqada”nın silahlıları 44 günlük müharibə zamanı Azərbaycana qarşı hərbi əməliyyatlarda iştirak etmək üçün Ermənistana keçiblər. Əsəd Dəməşqdən qaçdıqdan sonra dekabrın 19-da onlar “Suriyanın müdafiəsi istiqamətində kursun dəyişməz olduğunu” elan ediblər.

Eyni zamanda o, Bəşər Əsədlə Ermənistan hakimiyyəti arasında dostluq bəyanatlarının sadəcə sözlərlə məhdudlaşmadığını vurğulayıb. “Təsadüfi deyil ki, 2019-cu ildə 100 erməni əsgəri Ermənistandan Suriyanın Hələb şəhərinə gəlib”, - deyə ekspert xatırladıb.

Tuğçe Tecimer əmin olduğunu bildirib ki, Suriyada vəziyyəti normallaşdırmağın yeganə yolu terrorçuların hərəkətlərinin minimuma endirilməsi və Dəməşqdə yeni administrasiyasının nəzarətində olan silahlı qüvvələr tərəfindən qonşu ölkənin bütün ərazisinə nəzarət edilməsidir.

Ramin Abdullayev

AZƏRTAC-ın xüsusi müxbiri

Ankara