ÜAK RUSİYADA AZƏRBAYCAN DİASPORUNUN MƏNAFELƏRİNİ TƏMSİL EDƏN ƏSAS TƏŞKİLATDIR
ÜAK-ın vitse-prezidenti, İcra aparatının rəhbəri Natiq Ağamirov AZƏRTAC-ın xüsusi müxbirinə bildirmişdir ki, ötən dövrü gündən-günə çox əhəmiyyətli ictimai-siyasi təşkilata çevrilən Konqresin, ümumən Azərbaycan diasporunun təşəkkülündə növbəti və çox mühüm mərhələ kimi qiymətləndirmək olar. Konqres bu müddət ərzində Rusiyanın tanınmış ictimai təşkilatlarından biri olmuş və Rusiya cəmyyətinin bütün sahələrində Azərbaycan diasporunun mənafelərini təmsil edən əsas təşkilat kimi tanınmışdır. Bu gün Rusiya Federasiyasının 67 subyektində 73 regional şöbəni və təşkilatı birləşdirən Konqres həm Rusiyanın, həm də Azərbaycanın ictimai həyatında layiqli yerini tutmuşdur.
M.Ağamirovun sözlərinə görə, Konqres öz fəaliyyətində milli-mədəni işə, o cümlədən azərbaycanlıların dilinin, mədəniyyətinin, milli özünəməxsusluğunun qorunub saxlanılmasına və gənclərlə işə xüsusi diqqət yetirir. O demişdir: “Bu işin əsas xüsusiyyəti ondan ibarətdir ki, Konqresin fəaliyyətinə iki ölkənin dövlət hakimiyyəti orqanları, elmi idarələri, ictimai təşkilatları ilə birgə tədbirlər keçirilməsi təcrübəsi inamla tətbiq olunur”.
Diaspor hərəkatı tarixində ilk dəfə olaraq Konqres Rusiya ilə Azərbaycan arasında iqtisadi əməkdaşlığa dair hökumətlərarası komissiyanın tamhüquqlu üzvü olmuş, Milli Məclisin və RF Federal Məclisi Dövlət Dumasının Parlamentlərarası Komissiyasının tərkibinə daxil edilmişdir. ÜAK-ın təşəbbüsü ilə Azərbaycan-Rusiya İşgüzar Əməkdaşlıq Palatası ilə birgə və iki dövlətin hökumətlərinin köməyi ilə birinci “Azərbaycan-Rusiya ticarət-iqtisadi münasibətləri: onların inkişaf meylləri və perspektivləri” adlı ilk iqtisadi forum keçirilmişdir. Rusiya və Azərbaycanın təhsil nazirlikləri arasında razılığa əsasən, ilk dəfə olaraq, Rusiya ali məktəblərinə müsabiqədənkənar qəbul edilmək üçün Azərbaycan vətəndaşları olan abituriyentlərin qəbul imtahanı keçirilmişdir. Ötən dövr ərzində Rusiya Prezidenti Administrasiyası və RF hökuməti ilə, Dövlət Dumasının milli məsələlər komitəsi ilə dinamik və sabit əməkdaşlıq həyata keçirilmişdir. Komitə ilə əməkdaşlıq haqqında saziş də imzalanmışdır. Moskva meriyası və hökuməti ilə çox sıx və səmərəli qarşılıqlı fəaliyyət yaranmışdır.
ÜAK-ın İcra aparatının rəhbəri, eyni zamanda bildirmişdir ki, Konqresin fəaliyyətinin mühüm istiqamətlərindən biri də təşkilati quruculuqdur. Burada əsas diqqət regional təşkilatların sayının artırılmasına yox, mövcud təşkilatların möhkəmlənməsinə, RF subyektlərinin ictimai həyatında onların rolunun və əhəmiyyətinin artırılmasına yönəldilmişdir. Bu istiqamətdə işin yeni forması Konqres nəzdində diaspor ictimai təşkilatlarının Əlaqələndirmə Şurasının, habelə RF Federal dairələri nəzdində ÜAK-ın dairə şuralarının yaradılması olmuşdur.
N. Ağamirov daha sonra demişdir ki, ÜAK Mərkəzi Şurasının iclasında Konqresə təzə qeydiyyata alınmış 9 regional şöbə daxil edilmiş, Konqresin 3 vitse-prezidenti – REA-nın müxbir üzvü, “Voprosı istorii” jurnalının baş redaktoru Ə. İsgəndərov, dairə şuralarının rəhbərləri: Şimal-Qərb Federal dairəsinin rəhbəri Q. Abbasov, Ural Federal dairəsinin rəhbəri Ş. Şixlinski seçilmişdir. “Uralsib” maliyyə korporasiyasının birinci vitse-prezidenti, “Uralsib” SC idarə heyətinin sədri F.Axundov və “ İVR treydinq qrupp” şirkətinin prezidenti V. Məmmədəliyev Konqresin rəyasət heyətinin üzvləri olmuşlar.
N. Ağamirov demişdir: “Bununla belə, biz ÜAK-ın bəzi regional təşkilatlarının işlərindəki nöqsanları da bildirməyə məcburuq. Şimali Osetiya Respublikası-Alaniya, Komi, Voronej, Kamçatka, Kemerovo, Kostroma, Rostov, Ryazan kimi regionlarda və digər vilayətlərdə diasporumuzun həyatı çox passiv keçir və bəzən Konqresin fəallarının diqqətindən kənarda qalır, həmvətənlərimizin hüquqlarının müdafiəsi üzrə iş görülmür, regionların icra hakimiyyəti orqanlarında onların mənafeləri zəif ifadə olunur. Bu da diasporun məsələlərinin həllində Konqresin real təsirinin azalmasına gətirib çıxarır. Bizim vəzifəmiz yaxın gələcəkdə bu regional təşkilatların işini fəallaşdırmaq, bütün diaspor qurumlarının birgə fəaliyyətinin əlaqələndirilməsini gücləndirməkdir”.
ÜAK İcra aparatının rəhbəri bildirmişdir ki, Mərkəzi Şuranın iclasında regional təşkilatların rəhbərləri ilə RF-nin müxtəlif subyektlərində yaşayan həmvətənlərimizin daha da sıx birləşdirilməsi, Rusiyada azərbaycanlıların müsbət imicinin formalaşdırılması, onların hüquq və mənafelərinin qorunması, habelə Azərbaycanla Rusiya arasında dostluq və əməkdaşlıq münasibətlərinin inkişafına kömək göstərilməsi barədə geniş fikir mübadiləsi aparılmışdır. İclasda çıxış edən nümayəndələr Konqresin regionlarda apardığı işlərin aktuallığını vurğulamış, üzləşdikləri problemlərdən danışmış, təcrübə mübadiləsi aparmış, fəaliyyət proqramına daxil ediləcək və bütövlükdə, işin fəallaşmasına kömək edəcək çoxlu maraqlı təkliflər irəli sürmüşlər. Hazırda Ümumrusiya Azərbaycan Konqresinin bu ilin oktyabrına nəzərdə tutulmuş ikinci qurultayına hazırlıq görülür.
Bölmənin digər xəbərləri
