UKRAYNA HÖKUMƏTİNDƏ DAHA BİR “ADAMIMIZ”
Xəbər verildiyi kimi, bu yaxınlarda Ukrayna Prezidenti Leonid Kuçmanın fərmanı ilə həmyerlimiz Elbrus Abdullayev Nəqliyyat Nazirliyinin dövlət katibi vəzifəsinə təyin edilmişdir.
Bu günlərdə isə daha bir təyinat barədə məlumat alınmışdır. Ukrayna hökumətinin əsas qurumlarından biri olan Sənaye Siyasəti Nazirliyinin rəhbəri vəzifəsinə keçmiş bakılı Anatoli Konstantinoviç Myalitsa təyin olunmuşdur.
1940-cı ildə Çita vilayətində anadan olan A.Myalitsa gənclik illərini Bakıda keçirmişdir. Xarkov Aviasiya İnstitutunu bitirdikdən sonra o, müxtəlif aviasiya müəssisələrində işləmiş, Xarkov dövlət aviasiya - istehsalat müəssisəsinin baş direktoru vəzifəsinədək yüksəlmişdir. 1990-cı illərin əvvəllərində Xarkov Vilayət Partiya Komitəsinin birinci katibi olmuşdur. O, Ukrayna Qəhrəmanıdır. Anatoli Konstantinoviç həmişə vurğulayır ki, qazandığı uğurlara görə Azərbaycan xalqına, gənclik dövrlərini keçirdiyi, bir şəxsiyyət kimi formalaşdığı Azərbaycana borcludur. A.Myalitsa deyir ki, Bakı kimi ikinci beynəlmiləl şəhər tanımır.
Zeynal Ağazadə
AZƏRTAC-ın ştatdankənar müxbiri
Kiyev
Bölmənin digər xəbərləri
