Ukraynalı siyasətçi: Azərbaycanın sülh planını tamamilə mütərəqqi hesab etmək olar
Kiyev, 8 noyabr, AZƏRTAC
Şuşanın azad edilməsi günündə qeyd olunan Zəfər Günü demək olar ki, təkcə ərazi bütövlüyünün bərpası baxımından deyil, həm də BMT və Avropa Şurası Parlament Assambleyasının qərarları əsasında beynəlxalq hüququn kulminasiya nöqtəsidir.
Bu sözləri AZƏRTAC-a ukraynalı siyasətçi, ictimai xadim Borislav Bereza deyib.
O vurğulayıb: “Birmənalı olaraq demək olar ki, BMT və Avropa Şurası Parlament Assambleyasının qərarlarına müvafiq olaraq, Qarabağ Azərbaycanın ayrılmaz tərkib hissəsi olub və belə də qalır. Ona görə də ərazi bütövlüyünün bərpası beynəlxalq təşkilatların qərarları çərçivəsində baş verən prosesdir. Bu ərazi əvvəllər işğal edilib. İndi o, Bakının nəzarəti altındadır. Müvafiq olaraq, hazırda bütün hüquqi proseslər beynəlxalq hüququn normalarına uyğundur”.
Regionda vəziyyətin normallaşdırılması üzrə Azərbaycanın sülh planını tamamilə mütərəqqi hesab edən Borislav Bereza deyib: “Məsələ ondadır ki, şərtlərdən biri Qarabağ ermənilərinə təkcə hüquq və azadlıqlarının, o cümlədən etiqad azadlığı və öz dilinin sərbəst istifadəsinin təmin edilməsi deyil, həm də vergi və sosial sahələrdə güzəştlər vəd edilib. Bildiyimə görə, regiona müəyyən iqtisadi güzəştlər veriləcək və o, yetərincə cəlbedici olacaq. Regiondan kifayət qədər çoxlu sayda ermənilərin getməsinə baxmayaraq, onların bir hissəsi qayıda və Azərbaycanın bütün vətəndaşları ilə ümumi şəraitdə yaşaya bilər. Bundan başqa, hesab edirəm ki, sülh planı bütün hərbi tədbirlərin dayandırılması və vətəndaşların normal həyata qayıtmasını ehtiva edir. Bu səbəbdən orada yaşayan və müharibə yerinə sülhü seçən insanların rifahına yönəlmiş hər şey, əlbəttə ki, müsbət qiymətləndirilməlidir. Bu kontekstdə orada yaşamış və bütün hüquq və azadlıqlarının təmin olunacağı insanların maraqlarının nəzərə alındığı rasional yanaşmanı qeyd etməyə bilmərəm. Bu, hörmətə layiqdir”.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
