Ulu Öndərin tövsiyələri bu gün də Neft Fondunun fəaliyyətində rəhbər tutulur
Bakı, 12 may, AZƏRTAC
Azərbaycan Respublikası Dövlət Neft Fondunda müasir müstəqil Azərbaycan dövlətinin qurucusu Ümummilli Lider Heydər Əliyevin anadan olmasının 100-cü ildönümünə həsr olunmuş tədbir keçirilib və Ulu Öndərin əziz xatirəsi yad edilib.
Tədbir iştirakçılarına əvvəlcə Heydər Əliyevin 100 illik yubileyi münasibətilə hazırlanmış sənədli qısa film təqdim olunub.
Fonddan AZƏRTAC-a bildirilib ki, tədbirdə çıxış edən ARDNF-in İcraçı direktoru İsrafil Məmmədov Azərbaycan dövlətinin və xalqının bütövlüyü və inkişafı naminə fədakarlıqla çalışıb, öz həyatını xalqımızın xoşbəxt gələcəyinə həsr edən Ulu Öndər Heydər Əliyevin əsasını qoyduğu yeni neft strategiyasından və bu strategiyanın ölkə iqtisadiyyatına verdiyi töhfələrdən söz açıb. İcraçı direktor deyib ki, məhz bu strategiyanın məhsulu olaraq, neft və qazın satışından əldə edilən valyuta daxilolmalarının toplanması və səmərəli idarə edilməsi məqsədilə Prezident İlham Əliyevin təklifi ilə 1999-cu ildə Ulu Öndər Heydər Əliyev tərəfindən Dövlət Neft Fondunun əsası qoyulub. İsrafil Məmmədov yaradılarkən 271 milyon ABŞ dollarına bərabər olan Neft Fondunun aktivlərinin həcminin hazırda 54 milyard ABŞ dollarını keçdiyini qeyd edib. İcraçı direktor bildirib ki, Heydər Əliyevin sədrliyi ilə 2002-ci il iyulun 16-da keçirilən Dövlət Neft Fondunun Müşahidə Şurasının birinci iclasında Ulu Öndərin verdiyi tövsiyələr bu gün də Neft Fondunun fəaliyyətində rəhbər tutulur.
Tədbirə, həmçinin uzun illər dahi şəxsiyyət Heydər Əliyevlə birgə çalışmış, dövlət qulluğunda xidmətlərinə görə "Şöhrət" və "Şərəf" ordenləri ilə təltif olunmuş Dilarə Seyidzadə qonaq qismində dəvət edilib. ARDNF-in İcraçı direktorunun müşaviri Nərgiz Nəsrullayeva-Müdüroğlu ilə birgə müsahibə formatında baş tutan söhbətdə Dilarə Seyidzadə Ulu Öndərin xidməti fəaliyyəti barədə çıxış edib, dahi şəxsiyyət haqqında fikir və xatirələrini bölüşüb, Ulu Öndər Heydər Əliyevin zəngin biliyi, dünyagörüşü və cəsarəti ilə beynəlxalq müstəvidə böyük rəğbət qazandığını qeyd edib.
Sonda Dilarə Seyidzadə Ulu Öndərin fəaliyyətinə dair Fondun əməkdaşlarının suallarını cavablandırıb. Dilarə Seyidzadə Heydər Əliyevin malik olduğu liderlik keyfiyyətləri barədə onlara tövsiyələrini bildirib, Vətənə hədsiz sevgi, məsuliyyət, özünə qarşı tələbkarlıq və digər bu kimi keyfiyyətlərin gənc nəslin Heydər Əliyevdən öyrənməli olduğu ən mühüm dəyərlər olduğunu söyləyib.
Bölmənin digər xəbərləri
