“UNİLEASİNG” LİZİNQ ŞİRKƏTİ 12 VAHİD “NEW HOLLAND” TEXNİKASININ ALINMASI ÜÇÜN MÜQAVİLƏ BAĞLAMIŞDIR
AZƏRTAC xəbər verir ki, “Unileasing” lizinq şirkəti ümumi dəyəri 3,2 milyon dollar olan 12 vahid “New Holland” texnikasının alınması üçün müqavilə imzalamışdır.
“Tikinti texnikası və avadanlığı lizinqi” layihəsinin rəhbəri Fərhad Kərimovun dediyinə görə, “Unileasing” “New Holland tikinti texnikası lizingi” layihəsinin ikinci mərhələsinə başlayır. Layihəyə əsasən, İtaliya istehsalçısının tikinti texnikasını faiz dərəcəsi üzrə illik 16 faizdən başlayaraq 48 ay müddətinədək lizinqə almaq olar. 2007-ci ilin sonundan 2008-ci ilin mayınadək layihənin birinci mərhələsi çərçivəsində “Unileasing” şirkəti vasitəsi ilə ümumi dəyəri 2,5 milyon dollar olan 17 vahid “New Holland” tikinti texnikası satılmışdır.
F.Kərimov bildirmişdir ki, birinci mərhələnin uğurlu nəticələrini nəzərə alaraq, “Unileasing” şirkəti “Grand Motors” şirkəti ilə birlikdə İtaliyanın “New Holland” şirkəti ilə ümumi dəyəri 3,2 milyon dollardan çox olan müqavilə bağlamışlar. Müqaviləyə əsasən yaxın vaxtlarda “New Holland”ın 12 vahid müasir tikinti texnikası yerli bazara daxil olacaqdır.
“Unileasing” və “Grand Motors” şirkətlərinin planlarına əsasən, həmin texnika yerli bazarda üçüncü kvartal ərzində satılacaqdır.
