Uşaq hüquqları gələcəyin təminatıdır - ŞƏRH
Bakı, 18 noyabr, AZƏRTAC
“Uşaqların hüquqlarının qorunması hər bir cəmiyyətin mənəvi və sosial inkişaf səviyyəsini müəyyən edən əsas göstəricilərdən biridir. Hər bir uşaq doğulduğu andan etibarən yaşamaq, inkişaf etmək, təhsil almaq, sevgi və qayğı ilə əhatə edilmək, zorakılıq və istismardan müdafiə olunmaq hüququna malikdir”.
AZƏRTAC xəbər verir ki, bu fikirləri Abşeron Rayon İcra Hakimiyyəti başçısı yanında Uşaq hüquqlarının müdafiəsi üzrə komissiyanın məsul katibi Şükufə Məmmədova bildirib. Onun sözlərinə görə, bu, təkcə ailənin deyil, dövlətin və cəmiyyətin birgə məsuliyyətidir. BMT-nin 1989-cu ildə qəbul etdiyi “Uşaq Hüquqları Haqqında Konsvensiya” bu sahədə ən mühüm beynəlxalq sənəddir. Vurğulanıb ki, Azərbaycan Respublikası 1992-ci ildə həmin Konvensiyaya qoşulmaqla uşaq hüquqlarının qorunmasını dövlət siyasətinin prioritet istiqamətlərindən birinə çevrmişdir.
“Azərbaycan Respublikasının Konstitusiyası, “Uşaq hüquqları haqqında” Qanun (19 may 1998-ci il), “Ailə Məcəlləsi”, “Yetkinlik yaşına çatmayanların baxımsızlığının və hüquq pozuntularının profilaktikası haqqında” Qanun və digər normativ aktlar bu sahədə möhkəm hüquqi baza formalaşdırıb. Dövlət siyasətinin yerli səviyyədə həyata keçirilməsi məqsədilə bütün rayon və şəhər icra hakimiyyətəri yanında uşaq hüquqlarının müdafiəsi üzrə komissiyalar yaradılıb. Bu komissiyalar uşaq hüquqlarının təminatında, profilaktik tədbirlərin görülməsində və maarifləndirmə işlərində birbaşa mühüm rol oynayır. Son illərdə Azərbaycan Respublikasının Prezidenti İlham Əliyev və Birinci vitse-prezident Mehriban xanım Əliyeva tərəfindən həyata keçirilən sosial siyasət uşaqların hüquqlarının daha etibarlı qorunmasına, onların inkişafı üçün bərabər imkanların yaradılmasına yönəlib. Uşaq hüquqları üzrə komissiyalar da bu siyasətin yerli icra mexanizmini təşkil edir. Komissiyalarda məsul katib və uşaq və ailələrlə iş üzrə psixoloq ştatların təsis edilməsi uşaqlarla işdə peşəkar psixoloji dəstəyin və qərarların icra mexanizmlərinin gücləndirilməsinə xidmət edir. Abşeron rayonunda da bu sahədə lazımi işlər görülür. Belə ki, RİH yanında Uşaq hüquqlarının müdafiəsi üzrə komissiyanın təşəbbüsü ilə məktəblərdə, kolleclərdə ictimai mərkəzlərdə “Uşaq hüquqları aylığı”, “Erkən nikahın fəsadları”, “Zorakılığa yox deyək!” kimi maarifləndirici aksiyalar keçirilir. Hər tədbir zamanı yüzlərlə şagird və valideynlərlə söhbət aparılır, sorğu vərəqləri paylanılır, uşaqların sosial-mənəvi inkişafı ilə bağlı maarifləndirici materiallar təqdim olunur. Sevindirici haldır ki, Abşeronda son illərdə uşaqların hüquqlarının qorunması istiqamətində həyata keçirilən tədbirlər müsbət nəticələr verməkdədir. Belə ki, komissiyaya daxil olan müraciətlərin təhlili göstərir ki, 2024-2025-ci illərdə uşaqların hüquqlarının pozulması ilə bağlı müraciətlərin sayında təxminən 20 faiz azalma müşahidə olunub”, - deyə Şükufə Məmmədova vurğulayıb.
Onun sözlərinə görə, İcra Hakimiyyəti yanında uşaq hüquqları üzrə komissiyaların fəaliyyəti təkcə hüquqi tədbirlərlə məhdudlaşmır, həm də maarifləndirmə, ailələrlə sosial iş və uşaqların rifahının qorunmasına yönəlmiş çoxşaxəli fəaliyyət sahəsini əhatə edir. Bu mənada, komissiyaların gördüyü hər bir iş gələcək nəsillərin rifahına xidmət edən ən dəyərli fəaliyyət sahəsidir:
“Ümummilli Lider Heydər Əliyevin sözləri ilə desək, “Uşaqlar bizim gələcəyimizdir. Onların sağlam, savadlı və xoşbəxt böyüməsi dövlətimizin və cəmiyyətimizin başlıca vəzifəsidir”. Bu fikirlər bu gün də Azərbaycan dövlətinin sosial siyasətinin bünövrəsini təşkil edir. Uşaqların rifahı, təhsili və təhlükəsizliyi uğrunda görülən hər bir iş ölkəmizin sabahına qoyulan mənəvi sərmayədir. Son illər Azərbaycanın müstəqilliyi və ərazi bütövlüyü uğrunda şəhidlik zirvəsinə ucalan qəhrəmanların ailələri, xüsusilə də onların bizə əmanət qalan övladlarına diqqət və qayğı göstərilir. Bu sahədə Prezident İlham Əliyevin və Birinci vitse-prezident Mehriban xanım Əliyevanın göstərdiyi xüsusi diqqət ölkə üzrə icra strukturları üçün birmənalı fəaliyyət xətti müəyyən edib. Şəhid ailələrinin övladlarının rifahı və müdafiəsi sahəsində görülən bütün işlər onların sağlam, təhlükəsiz və xoşbəxt böyümələrinə xidmət edir, eyni zamanda Azərbaycan dövlətinin sosial siyasətinin mühüm tərkib hissəsini təşkil edir. Ölkəmizin hər yerində olduğu kimi, Abşeron rayonunda da şəhid ailələrinə daim diqqət göstərilir. Rayonda keçirilən tədbirlərdə fəal iştirak təmin olunur və həyatlarının hər bir mərhələsində dövlətin qayğısı, diqqəti xüsusi olaraq hiss etdirilir”.
Bölmənin digər xəbərləri
