UŞAQ MUĞAM İFAÇILARININ IV RESPUBLİKA MÜSABİQƏSİNİN QALİBLƏRİ MÜKAFATLANDIRILMIŞLAR
AZƏRTAC xəbər verir ki, iyunun 12-də Rəşid Behbudov adına Azərbaycan Dövlət Mahnı Teatrında uşaq muğam ifaçılarının IV respublika müsabiqəsinin qaliblərinin mükafatlandırılması mərasimi keçirilmişdir.
Xatırladaq ki, xalqımızın mədəni sərvətlərini qoruyub saxlamaq, inkişaf etdirmək, milli musiqimizə, xalq mahnıları və təsniflərə, muğam sənətinə marağı artırmaq və yeni istedadları aşkara çıxarmaq məqsədi ilə Mədəniyyət və Turizm Nazirliyi 2008-ci ilin aprel-may aylarında uşaq muğam ifaçılarının IV respublika müsabiqəsini keçirmişdir.
Mədəniyyət və turizm naziri Əbülfəs Qarayev, münsiflər heyətinin sədri, xalq artisti Canəli Əkbərov çıxış edərək bildirmişlər ki, müsabiqədə ölkəmizin 60-a yaxın yaşayış məntəqəsindən 18 yaşınadak olan yeniyetmələr öz istedad və bacarıqlarını nümayiş etdirmişlər.
Natiqlər milli-mənəvi dəyərlərimizin, muğamlarımızın qorunub saxlanmasına, onun dünyada tanınmasına və gənc istedadların aşkara çıxarılmasına göstərdiyi qayğıya görə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevaya minnətdarlıqlarını bildirmişlər.
Sonra uşaq muğam ifaçılarının IV respublika müsabiqəsinin qalibləri elan olunmuş, mükafatlar verilmişdir.
Qaliblərin yekun konserti olmuşdur.
Bölmənin digər xəbərləri
